「積極回應國家發展戰略，跟進北部都會區建設」議案

主席，早喺上屆立法會任期初，我已倡議要加緊開發新界北部，改變香港過往「重南輕北」嘅發展策略，打破特區城市規劃以深圳河為界嘅思維框框，從而提供更多可供市民居住及不同產業發展嘅用地，加快香港融入國家發展大局。因此，對於特區政府兩年前提出嘅《北部都會區發展策略》，到今年再深化成為《北部都會區行動綱領》，我係好支持。

近年，由於財政儲備下降，部分人擔心政府係咪有足夠財力，去同時推展北部都會區、交椅洲人工島、以及其他多項大型基建同發展項目，因而建議港府好似最近英國同澳洲咁，叫停部分基建，等到經濟好轉先再考慮重推。

我同業界一直強調，新土地嘅開發同新市鎮嘅發展，係重要嘅未來投資，對推動經濟同改善民生至為重要，亦會帶來長遠及理想嘅回報，政府不應因一時嘅經濟同財赤問題，而大幅減慢或者減少投資。當其他地方因為種種原因而叫停基建，減慢發展，香港如能持續、有序咁推行，未來發展就會快人一步。

不過，面對短期嘅財政壓力，我認同部分修正案指出，政府應為北都發展制訂詳細嘅推展時間表同明確嘅財務安排，認真審視各個項目嘅經濟同社會效益，訂定優次，避免工程過度集中，而出現人手、現金流及通脹壓力，防範工程出現超支同延誤。

事實上，我喺北都策略剛發表時已提出，有別於近乎白紙一張嘅人工島填海計劃，北都發展面對住好多現有嘅局限同挑戰。整個北都面積達到300平方公里，涵蓋多個現存或處於唔同發展階段嘅發展區，現時喺區內嘅居民、商戶、農戶等嘅生活作息，仲有一啲墓地、祖堂地、有較高生態價值嘅濕地，點樣妥善做好安置、保育、同補償，必須有計劃咁小心處理。

簡而言之，北都發展係需要快，但係唔好急；係要審慎，但係唔好停。

部分修正案提到，要有效推動北都發展，必須加強政府嘅跨部門統籌與執行能力，貫徹「有為政府」與「高效市場」更好嘅結合，呢兩點係亦我嘅一貫主張，最初比較少人講，現已成為大部分社會人士嘅共識。反而有一點近期較少人談論，就係李浩然議員修正案提到嘅綠色及低碳城市建設。

香港要喺2050年前達致碳中和，無論我哋點樣努力推動節能減排同回收減廢，喺現有社區係較難完全做到。因此北都同人工島等新發展區，喺設計及規劃時已經要有計劃咁做好落實低碳、零碳嘅生活，包括減少能源消耗、多啲綠化、樓宇設計能夠善用自然光、自然通風同環保物料等等。喺呢方面，我哋建測規園業界可以作出更大嘅貢獻，希望政府能重視同善用。本人謹此陳詞，支持原議案及各項修正案。