[:zh]20210512《2021年公職(參選及任職)(雜項修訂)條例草案》二讀發言[:]

[:zh]代主席，我發言係支持《2021年公職(參選及任職)(雜項修訂)條例草案》二讀。草案其中一個主要目的，係透過本地立法，落實全國人大常委員會喺2016年底，就《基本法》第104條作出嘅解釋。

2016年10月12日，喺呢個會議廳內發生嘅宣誓風波，唔少市民至今仍歷歷在目。當日最少有15位自稱為「非建制」、後來被統稱作「攬炒派」嘅立法會選舉當選人，喺宣誓就任時以不同方式，包括一邊宣誓、一邊舉傘、打鼓，喺法定誓詞前後「加料」、以「龜速」宣讀誓詞等等，視莊嚴嘅宣誓儀式同法定嘅要求於無物。

當中最令人髮指嘅，係兩名前青年新政成員梁頌恆同游蕙禎，喺宣誓時公然辱華同展示港獨標語，愧對全國14億同胞及全球嘅中華兒女。兩人嘅宣誓已即場被裁定無效，但礙於相關本地法例存在漏洞，當局未能取消餘下多位未有有效宣誓嘅攬炒派議員資格，最終要由人大常委出手嚟堵塞漏洞。特區政府喺相隔差不多5年之後，先至提出今次草案落實相關釋法規定，實在係太慢、太遲。

草案根據人大常委會喺去年6月通過嘅《港區國安法》規定，將喺就任時須宣誓擁護《基本法》同效忠特區嘅規定，由立法會議員擴展到區議員。其實現行法例已訂明區議會選舉嘅參選人，喺參選時要簽署相關嘅擁護同效忠聲明，並須經選舉主任確認，但喺當選後至就職時就毋須再作宣誓，亦都出現咗漏洞。

大家都睇到，不少喺2019年區選中當選嘅攬炒派區議員，公然鼓吹港獨，散播仇狠，無視憲法與《基本法》規定。雖然區議會只屬地區性諮詢組織，但區議員仍然擁有一定公權力，用納稅人公帑嚟出糧、開會同搞活動，要求佢哋喺就任時宣誓擁護《基本法》同效忠特區，絕對係應有之義。如果有人連咁要求都覺得有困難，根本就不配擔任區議員，一開始就唔應該參選。

最近先後有多名攬炒派區議員辭職，部分已講明、或估計係因為唔想宣誓、怕咗宣誓。我覺呢啲人辭職，對地區、對香港都唔會係損失，反而係好事，亦反映今次修例，起到將區議會撥亂反正、為香港政制正本清源嘅效果。

草案嘅另一項目的，係落實人大常委會喺去年11月，就立法會議員資格問題作出嘅決定。當時有多位攬炒派立法會議員，喺參選區議員時，被選舉主任裁定不符合擁護《基本法》同效忠特區嘅規定。但同樣，礙於現行法例存有漏洞，當局無法取消佢哋嘅立法會議員資格，只能任由呢啲已被依法認定係不擁護《基本法》及不效忠香港特區嘅人，繼續佔有立法會嘅議席同行使公權，情況相當荒謬，並對香港以至國家嘅利益構成威脅。

草案根據人大常委決定，喺相關本地法例引入機制，授權律政司司長向法庭提出程序，取消已被依法認定有違效忠要求嘅立法會同區議會議員資格，絕對係合法、合情、合理、合憲，同埋係有必要嘅。對於手握公權嘅公職人員，唔應該只喺宣誓嗰一刻擁護《基本法》同效忠特區，而係喺佢哋在任時任何時刻都符合有關要求，咁樣至能夠落實「愛國者治港」嘅原則。

按照有關機制，律政司司長向法庭提出取消議員資格嘅程序後，被指控嘅立法會或區議會議員就會即時停職，包括不能再出席各類立法會或區議會會議，不得以議員身份行事及舉辦活動等。對於有議員質疑有關停職安排會否過於嚴苛，當局已解釋，首先政府只會對已被依法認定有違擁護同效忠要求嘅議員提訴，唔會、亦唔能夠胡亂啟動有關程序；其次係，被指控嘅議員有權向法庭申請解除停職規定。

我認同有關停職安排係比較嚴苛嘅，但如果唔係立法會同區議會喺最近幾年，發生咗咁多荒謬絕倫、違法違憲嘅事件，中央及特區政府就唔使搞咁多嘢。只要大家都奉公守法，尊重憲法同《基本法》，喺參選、宣誓同就職時，真心、誠意擁護《基本法》同效忠香港特區，就一定能輕易地符合草案嘅各項規定。草案對香港市民嘅人權自由、對受到《基本法》保障嘅選舉權及被選舉權，唔會產生任何影響。

代主席，最後我想再講幾點今次草案未有解決嘅問題，第一係區議會選舉候選人嘅資格審查機制。全國人大會議喺今年3月11日，通過有關完善香港選舉制度嘅決定，包括成立「香港特別行政區候選人資格審查委員會」，負責就行政長官選舉、立法會選舉、以及選舉委員會界別分組選舉嘅候選人是否「愛國愛港」、是否符合擁護《基本法》同效忠特區嘅要求進行審查。

不過，對於區議會候選人嘅資格審查，人大決定並無提及，特區政府亦未有喺今次修例或有關完善選舉制度嘅本地立法中處理，繼續交由各區選舉主任嚟作出考慮同裁定。不少人都認為，有關做法並非係最理想。

我留意到政制及內地事務局局長，講過會研究有關問題，包括係咪由資審會一併負責區會候選人嘅資格審查工作。下屆區議會選舉應該兩年後就舉行，我希望當局能加快有關工作，唔好又拖4、5年先嚟修例。

此外，《港區國安法》第6條要求，香港特區居民在參選或就任公職時，應當依法簽署或宣誓擁護《基本法》同效忠特區。政府早前已要求全體公務員簽署相關聲明，但對於一啲並非由公務員、議員或主要官員出任，手握公權嘅重要公職，係咪都應該引入宣誓嘅要求呢？政府同樣講過會研究，但同樣冇講幾時會完成，呢啲都係現行法規存在嘅漏洞。

代主席，本人僅此陳詞，支持草案，支持完善香港公職人員嘅參選、宣誓及任職制度，全面落實「愛國者治港」原則，確保「一國兩制」實踐行穩致遠，不變形、不走樣。[:]