「嚴防新型冠狀病毒病輸入」議案發言

主席，新型冠狀病毒肆虐全球已超過兩年，香港嘅疫情一度受控，但最近亦抵擋唔到變種病毒Omicron入侵，爆發第五波疫情，政府再次被迫收緊社交距離措施，不單令到大量企業同員工嘅生計受損，原本已準備就緒、與內地恢復通關嘅安排，亦因而落實無期。今日係新一屆立法會首項辯論嘅議員議案，主題係如何嚴防新冠病毒輸入，全方位阻止擴散，盡早落實與內地通關，係相當適切嘅。

原議案提出要嚴防輸入，包括馬上堵塞現行貨機機組人員嘅檢疫漏洞，呢個大原則我係支持嘅，但具體點樣做、要收緊到乜嘢程度喇？我覺得係要小心、審慎咁作出平衡，平衡香港市民生活同經濟活動嘅需要。香港大部分嘅生活所需都係依賴進口，當中空運貨品按噸計比重唔高，只佔幾個%，但按貨品價格計算，就超過全港進口貨品嘅四成，因為一般只有較昂貴嘅貨品先會使用空運。

收緊貨機機組人員嘅檢疫規限，緊到完全冇貨機、或者只有好少貨機可以飛到，香港經濟同市民生活會受到幾大嘅衝擊呢？今次Omicron殺入社區，到底係機組人員嘅檢疫安排本身有問題，定係因為有個別人員違反咗既定嘅機制呢？議案要求嚴肅依法追究違規人員及公司嘅責任，呢點我係支持嘅，我知道政府正做緊嘢，警方日前亦已拉咗兩名涉嫌違規嘅機組人員。

貨機航班減少，肯定會令來貨少咗、貴咗，可能引發通脹，影響市民生活。之前內地收緊陸路同水路貨運人員嘅檢疫安排，就導致運費大增同運送時間延長，我哋建造業界亦深受其害，唔少建築材料都貴咗，來貨亦遲咗，影響建造成本同施工時間。

我希望政府會密切監察有關情況，適時公布相關嘅貨運同通脹嘅數據，並靈活、有效咁應對，採取適切措施平衡疫情風險同對市民生活嘅影響。政府同時要向公眾清晰咁解說，唔好令人覺得政府完全冇做嘢。其實相對於大部分國家同地區，香港已做得好唔錯。

原議案要求強化「安心出行」，加入追蹤緊密接觸者嘅功能，呢點好多人都提過，但亦有人憂慮私隱問題。我個人認為人命、健康係最重要嘅。但如果真係好擔心私隱問題，亦可參考某啲地區嘅做法，以處所為追蹤單位。你進入某啲人流較多、風險較高嘅處所，就要將資料留低，一旦相關處所有人感染，衞生當局就可以追查到你。但市民亦有權唔進入呢啲高風險處所，以維護自己嘅私隱。

最後係有關「疫苗氣泡」同「健康碼」，好多市民都未清楚係咩嚟嘅。前者最快年初四就實施，政府必須加強宣傳，例如請多啲臨時工周圍擺街站，教市民點樣下載同申請。只要大家齊心，香港一定可以戰勝疫情，恢復與內地通關。本人謹此陳詞，支持原議案及各項修正案。