有關立法會在疫情期間舉行遙距會議之議案

主席，2020年1月23日，香港錄得首宗新冠病毒確診個案，至今已差不多有兩年。為咗防止病毒擴散，立法會喺前年有一段時間幾乎係停止運作，所有會議暫時停開，藉此減少議員、官員同職員嘅實體接觸機會。

不過大家都明白，咁嘅情況唔應該維持太耐，因為立法會肩負制訂法律同審批公共財政等重要嘅職責，如果長時間開唔到會，唔單止會妨礙政府運作，整個香港嘅經濟、民生同城市建設都會受影響。

因此喺去年初，喺上一屆嘅議員同秘書處共同努力下，立法會通過議案，落實以視像、遙距嘅方式開會，而相關會議嘅運作亦相當暢順，冇出現重大嘅技術問題。但由於大家未完全搞清楚相關嘅法律問題，當時嘅遙距開會安排只適用於部分委員會會議，未有用於負責審批法案嘅立法會大會，以及負責審批撥款嘅財務委員會同相關小組。

事隔至今又過咗一年，香港嘅疫情一度受控，但最近又爆發第五波疫情，需要再度收緊社交距離措施。歐美等地嘅疫情更係完全失控，每日都有數十萬、甚至過百萬人感染。冇人知道全球幾時先可以完全戰勝疫情，亦冇人估到香港嘅疫情幾時又轉趨更嚴重，逼使大家再次要暫停實體開會。

因此，對於今日由李慧琼議員提出，兩項有關落實遙距會議安排嘅議案，我係支持嘅。尤其今次議案涵蓋埋大會、內會同財會等，以確保立法會嘅兩大重要憲制職能，唔因為疫情而癱瘓。

今次嘅議案訂明，立法會主席只可因應疫情變化而下令遙距開會，但其實有關機制應否可以應用於其他情況呢？例如係大型嘅自然天災、人為嘅騷亂暴動同恐怖襲擊等。

事實上過往亦真係發生過，2019年嘅黑暴風波，立法會大樓被人包圍封鎖，大部分議員返唔到嚟開會，會議廳最後更被人攻入佔領，大肆破壞，之後三、四個月都開唔到會。將來如果不幸再次發現類似事件，或其他天災，立法會亦可以藉通過決議案改為遙距開會，當然冇人希望我哋要用到有關安排喇！

去年辯論有關議案時，我促請秘書處要做好相關嘅網絡保安同身份認證明問題，依家仲多咗一個問題，就係網絡嘅穩定性同可靠性。近日我同其他議員參與咗多場視像會議，亦有發生因為網絡問題而聽唔清楚發言、出現其他雜音等等，我希望秘書處可以協助議員做好有關工作。

此外，上屆立法會嘅遙距會議，係使用咗ZOOM嘅服務，嚟緊相信都會繼續沿用，但係咪可以起碼有多一個選擇呢？以免一旦某個程式出咗事故，立法會就完全開唔到會。我希望秘書處會可盡早作研究同準備，包括一啲由我哋國家及企業所開發同管理嘅程式。主席，本人僅此陳詞，支持兩項議案。