《2024年稅務(修訂)(稅務寬免及兩級制標準稅率)條例草案》二讀發言

主席，香港經濟近年先後受到黑暴、疫情，以及美國等對我國嘅打壓影響，政府連續多年錄得巨額赤字。我早喺3年前嘅預算案建議書，已提議以「能者多付」嘅原則，喺不違反香港行之有效嘅簡單低稅制之下，適度調整部分稅項，以增加政府嘅收入，從而支持政府繼續提供各類公共服務，以及持續推展各項有利經濟發展及社會民生嘅基建同發展計劃。

財政司司長喺今年預算案宣布推行嘅薪俸稅標準稅率兩級制，正正係呢個原則。建議並冇大幅更改現行嘅稅制同稅基，只會影響年度入息淨額超過500萬元，即係月薪最少達41.6萬元嘅薪俸稅或個入息課納稅人，就佢哋喺年內超過500萬元嘅入息，多收百分之一嘅稅款。即係每多1萬元收入，就要向政府交多100蚊薪俸稅。

根據2021至22課稅年度嘅資料，估計會有約11,700位納稅人會跌入兩級制。呢啲大多數係我哋俗稱嘅「打工皇帝」，多交少少稅，唔會對佢哋嘅財政狀況同生活質素造成重大影響，但係每年庫房就可以增加約9億元嘅稅收。

當然，亦有人擔心，如果政府遲遲未能滅赤，第二級嘅標準稅稅率會唔會愈加愈多，甚或會否變成三級制、四級制，動搖香港嘅簡單低稅制，削弱特區喺挽留本地人才同吸引海外人才嘅競爭力。有議員曾提議喺草案加入「日落條款」，訂明政府會喺恢復盈餘後取消擬議嘅標準稅率兩級制。但咁做我認為反而會增加咗稅務政策嘅不確定性，因為香港作為一個外向型經濟體，庫房每一年最終係錄得赤字或盈餘，往往唔係政府可以完全掌控嘅。

此外，同樣根據2021至22年度嘅數字，引入標準稅率兩級制後，香港嘅薪俸稅實際稅率，只係由原來平均約8%，輕微調高至約8.04%，仍然低於新加坡等區內競爭對手。同稅率閒閒哋高達3成或以上，稅制極為複雜嘅北美同歐洲地區比較，更名副其實係「蚊髀同牛脾」，對香港競爭力嘅影響微乎其微。

再者，財政司司長已喺今年度預算案清楚交代，政府並唔係單靠加稅去滅赤，而係有一整套嘅「財政整合計劃」，基本原則係「先節流、後開源」，當中包括公務員零增長、繼續削減部門開支、適度加大發債，以及調整基建工程嘅推展優次等等，唔係只得加稅一招。政府同時會致力發展經濟，招商引才，希望做大個餅，搞活股市同樓市，企業賺錢多咗，打工仔收入增加，股市同樓市交投上升，政府各類稅收亦自然會增加，逐步恢復收支平衡。

另外，政府喺疫情期間，一度調高股票交易印花稅，以支持各項防疫抗疫開支。但當疫情過後，稅率現已還原番，可見政府係有不時檢視各種稅項，適時作出調整。

剛才提到，香港稅項少，稅率低，稅制極為簡單，但點解仲會有咁多基層、以至中層市民，覺得係香港生活得唔容易，好努力做嘢但都係冇錢剩，生活質素得唔到顯著改善呢？其中一個主要原因，係香港嘅土地房屋供應出咗問題，導致樓價高，租金貴，唔少家庭都要花上頗高比例嘅收入用嚟交租或供樓，住屋開支負擔遠高於繳交薪俸稅嘅壓力。

因此，即使係面對財赤，政府仍然有必要持續造地建屋，使到市民能夠改善居住壓力，做到真正安居樂業。過去我亦提過按照「能者多付」原則，針對一啲超級豪宅，例如係售價5,000萬元或以上嘅住宅單位買賣，徵收更高嘅物業交易印花稅稅率，但同時相應調低中低價物業嘅徵收率，藉此協助市民「上車」置業同換樓改善生活。

財政司司長喺今年2月嘅預算案宣布全面撤辣後，樓市交投明顯增加，但價格未見反彈，政府有條件再認真考慮有關建議，適度調低中低價住宅物業嘅印花稅，讓更多市民能夠更容易咁「上車」同換樓。本人謹此陳詞，支持《2024年稅務(修訂)(稅務寬免及兩級制標準稅率)條例草案》二讀。