20241219「拓展香港紅色旅遊及熊貓經濟」議案

主席，本月首個周末有14.5萬人次嘅內地旅客訪港，比上月嘅每日平均數上升接近3成，估計係受惠於深圳恢復「一簽多行」安排。中央贈港嘅一對大熊貓「安安」及「可可」，亦喺本月初首次同市民見面，有訪客不惜等候幾個鐘，都想同兩隻新來港嘅熊貓見面幾分鐘。呢啲都體現咗中央對特區嘅關愛同支持，嚟緊我哋需要做嘅，係如何善用好中央嘅惠港政策，把握機遇，為訪港旅客以至本地遊人，提供更優質同有特色嘅旅遊體驗。

講到紅色旅遊，除咗針對內地及海外遊客，對本港居民、尤其年輕人都係好重要，有助增強佢哋對國家嘅認識及認同。兩個月之前我組織一批業界人士，一齊去咗湖南韶山考察體驗，包括造訪毛澤東故居、毛主席廣場等。其實唔少景點我多年前都去過，但今次感覺係更為深刻。包括重新設計過嘅毛澤東紀念館，喺內容鋪排、善用科技及多媒體方面都落咗唔少心思，大大提升參觀者嘅興趣同了解。

當地人亦成功將毛主席同中國共產黨嘅歷史，同一啲文創產品、文藝表演、以至地道美食結合，帶動就業同消費，吸引咗唔少年輕人、學生去遊玩同學習。特區政府負責文化、旅遊、教育等政策嘅官員，好應該親身去體驗一下，從中取經。否則即使按照原議案嘅建議，興建咗「東江縱隊抗戰文物徑」同「共產黨歷史博物館」等硬件，但係如果軟件方面做得唔好，就發揮唔到應有嘅旅遊同教育效益，令資源未能盡用。

主席，熊貓本身已好Q，BB熊貓就更係人見人愛。早幾個月「家姐」同「細路」啱啱出世時，我同好多議員、市民同旅遊界人士，已就如何推動「熊貓經濟」提咗唔少建議，亦樂見當中唔少已獲政府同海洋公園採納。

受到內地旅客訪港模式改變影響，海洋公園早喺疫情前已出現財困，需要喺定位同營運方面作出改革，加上上屆政府提出嘅「躍動港島南」計劃，我同業界成立咗一個工作小組，希望借助海洋公園嘅轉型，以及當時陸續開幕嘅水上樂園、區內嘅多間酒店同活化工廈項目，帶動整個港島南部嘅發展同建設。可惜其後遇上疫情打擊，疫後嘅旅遊及消費模式進一步轉變，仲有樓市回落，包括非住宅物業市場嘅不振等等，令好多原有計劃都要推遲以至推倒重來。

依家大家嘅焦點去晒6隻熊貓嗰度，相信嚟緊有好多旅客同本地人都會前往海洋公園探望佢哋，但海洋公園整體仲係蝕緊錢，水上樂園項目仍舊艱苦經營之中，「躍動港島南」計劃畀人嘅感覺更好似停頓咗咁。我希望政府唔會貪新而忘舊，掛一而漏萬，剩係掛住發展北都同熊貓熱潮，而忽略咗整個港島南嘅發展，以及如何令到海洋公園長遠自付盈虧嘅初心。主席，本人謹此陳詞，支持動議。