20250115「落實推動醫療改革」議案

主席，政府近年面對財赤，主要原因之一係醫療、社福同教育經常開支喺過去10年增長快速。其中本財政年度嘅醫療衞生開支高達1279億元，當中86%，即1095億元屬經常性，按年上升4%，佔整體經常開支19%，與10年前比較(541億元)升咗超過1倍，預計未來仲會有增無減，主因係人口老化同服務嘅提升，大家必須嚴肅面對。

其中一個應對方法，係加強公私營醫療嘅分工協作，將兩者打通，更有效咁善用醫療資源同人手。關鍵之一係提高私家醫院收費嘅透明度，唔少有一定經濟能力嘅市民、包括長者，都擔心私院收費好似無底深潭，寧願排靠公營醫療。另外仲要做到病歷等資料互通，令到公院嘅醫生可以好方便咁睇到私院病人嘅病歷。

當局亦要加強打擊公營醫療系統嘅濫用同浪費問題，包括急症室嘅有效使用，過量、重複咁攞藥，以及最近有議員提到嘅「回流醫病」問題。局長指出好多執行上嘅困難，但市民希望聽到嘅係解決問題嘅方法。除咗通過調整收費同立法去解決，善用科技，改善行政，加強宣傳教育及資訊發布亦重要嘅。

除咗將公私營醫療打通，將中西醫及各類輔助醫療、基層醫療服務打通，對於善用資源人手及提升市民健康都有好大幫助，因此我係支持陳永光議員同林哲玄議員提出嘅修正案。

對於黃國議員提出嘅「發揮粵港澳大灣區資源互補優勢，進一步深化跨境醫療協作」，我亦十分認同。十幾年前大家冇想到依家有咁多香港人返內地整牙、做體檢、甚至係做手術同睇專科；原因其一係香港嘅私營醫療收費太貴，公營醫療就要排好耐隊；其二係內地嘅醫療服務水平提高咗好多，畀到市民信心，而且「性價比」高。

呢個「北上求醫」嘅趨勢，未來會點發展呢？香港嘅醫療政策、醫護人手規劃、醫院設施建設等，應該點樣去配合同調整呢？我認為政府應就此進行一次全面嘅研究同檢討。

主席，其實控制醫療開支增長最徹底嘅辦法，係從源頭提升市民嘅健康，治於未病，避免小病變大病。政府早喺97年制訂首個「健康城市計劃」，喺07年再發表《在香港推展健康城市計劃的指引》，但多年來都睇唔到冇咩具體措施同成績。故此3年前我喺本會提出議案，敦促政府加快實踐有關「健康城市」目標，包括加強預防性嘅治療，從城市規劃、建築設計，以至康體政策及飲食習慣等多方面提升市民健康。

今屆政府發表咗《基層醫療健康藍圖》，成立咗「基層醫療署」同「健康促進處」等，但係喺推動運動普及化同健康飲食文化方面，仲有好大改進空間，希望政府加倍努力。本人謹此陳詞，支持原議案及各項修正案。