20241219「積極應對經濟轉型，維持有利的營商環境」議案

主席，正如我喺尋日嘅《建造業付款保障條例草案》發言指出，香港嘅發展及建造業界，現正面對相當艱難嘅時期。經濟不景，樓市不振，息口高企，令私人發展及建造項目減少。喺僧多粥少之下，擔心公營嘅工程及顧問項目出現割喉式競爭。現時唔少業界公司收入都大減，面對現金流問題，銀行借貸亦都愈嚟愈困難，出現拖數同減薪減人等情況，個別公司更自行或被人申請清盤。有業界形容現時情況，比兩三年前疫情時更差，好似係完全睇唔到前景。

故此，對於有人建議政府大幅減慢各類基建工程同發展計劃，從而削支滅赤，我係反對嘅。因為咁樣不單止會打擊超過30萬人嘅建造業從業員嘅生計，令業界嘅拖數潮及清盤潮加劇，對整體消費市道，同香港未來嘅經濟同發展建設，亦會造成嚴重嘅影響。

對於私人發展，有人質疑發展商唔肯出錢投地，就係唔支持北部都會區發展，唔支持特區政府，甚或係唔愛國愛港嘅表現，有關說法我係不敢苟同。主席，點解接連有政府同公營機構嘅賣地及發展項目流標呢？我之前已喺不同場合分析過，表達過，並提出咗一啲解決同改善嘅方法。包括改革過往較為僵化同單一嘅土地批租制度，引入分期支付地價，以及政府與發展商分擔風險，同埋就未來利潤「分成」等做法。

我亦促請政府要多同市場人士，尤其係潛在嘅投標者及其他參與發展嘅持份者溝通，了解佢哋嘅關注問題同困難，真正做好「促進者」、「促成者」嘅角色，而唔係只做「監管者」以至「旁觀者」。好高興政府採納咗我意見，喺嚟緊嘅北都「片區開發」試點試行有關做法，希望喺市況欠佳，外圍環境又唔明朗之下，仍可吸引較多發展商同企業參與發展。我喺度亦呼籲相關持份者，向政府多提意見。

喺過去，有人或會質疑上述做法係「官商勾結」、「利益輸送」，其實正如原議案同修正案指出，政府咁做目的係改善營商環境，促進企業嘅蓬勃發展同項目嘅有效推展。冇理由政府促進旅遊業、零售業，或者餐飲業發展就係好事，一涉及發展、建造業界嘅正面措施，就會變成不恰當。

陳仲尼議員嘅修正案內容，包括「全面檢視現有嘅政策、法例框架及監管成效」、「拆牆鬆綁」、「優化審批流程」同「降低合規及經營成本」等等，都係我同發展、建造業界過去多年嘅要求。近年有愈嚟愈多議員、愈嚟愈多行業都有同樣嘅訴求，從好嗰方面諗，就係有更多人認識到有關問題嘅重要性，並促請政府改善；從壞嘅角度睇，就係有關官僚陋習一直未有顯著改善，影響到各行各業，有關情況係值得政府同我哋大家深思。

本人謹此陳詞，支持原議案及各項修正案。