20250122「加強規管建造工程安全」議案

主席，今屆立法會已辯論過多次有關工業意外同工程安全嘅議題。其中喺2023年初，本會恢復二讀《職安健(修訂)條例草案》，我同多位議員都指出，單靠加重罰則，告人，罰人，並唔係減少意外發生嘅最有效方法。

好不幸、真係好不幸咁畀我哋言中，草案通過接近兩年，工業意外數字，尤其係嚴重傷亡個案，並冇明顯咁減少。但係修例喺建造業界造成嘅反效果就好明顯，唔少建築師同承建商都話，佢哋依家愈嚟愈難搵人做工程項目嘅「認可人士(AP)」或者「授權簽署人(AS)」，因為要為工程期間發生嘅大大小小意外負上責任，但實際上某個工人有冇跟足要求攬好安全帶、某一粒索扣係咪裝得好穩陣，佢哋係未能完全控制到嘅。

今次張欣宇議員提出議案係好有意思嘅，唔再單講要告人、罰人同提高罰則，而係強調要建立與時並進嘅專業安全監管制度、明確各持份者嘅權責關係，同強化安全意識，呢3點我同業界都非常支持。

對於第1點，唔少業界都認為勞工處嘅地盤安全主任唔夠專業，必須改革，建立一套更好嘅安全專業制度。對於第2點，業界幾乎每一層嘅持份者，都認為現行嘅安全監管制度權責不清，有好多人做監管，出咗事有好多人都要負責，但唔代表做到有效嘅監管。

對於第3點嘅強化安全意識，我覺得係最重要嘅，但提升安全意識不能單靠業界自發。我喺修正案提出嘅3點建議，包括善用創新科技，加強工人培訓，以及透過投標制度同合約條款，嚟鼓勵安全表現良好嘅公司及從業員，就係想從制度上提升各持份者嘅安全意識同表現。

對於善用科技，其他多位議員嘅修正案都有提到，包括「自動危險偵測」裝備、「4S安全智慧工地」系統，仲有採用「建築信息模擬(BIM)」技術等等。呢啲裝備、系統同技術，全部都要錢嘅。但依家政府嘅工程招標制度，落標者喺安全方面加大投資，技術評分可能會高啲，但喺價格評分方面又可能蝕咗，係咪可以將相關安全開支分開嚟計呢？

此外，能否喺工程合約中訂明，如果承建商嘅安全表現良好，就可以獲發額外獎勵呢？要胡蘿蔔與棒子並用；純粹禁制曾經出意外嘅承建商投標，會否令到業界愈嚟愈少人做嘢，工程造價變得愈嚟愈高，但安全水平卻未必能夠提升。

建造業議會推動緊嘅「工人安全記分制」，目的係有效甄別安全表現較佳嘅工友，希望可以令佢哋多啲人請，攞高啲人工，通過經濟誘因嚟提升工人嘅安全意識。表現差嘅就要罰停賽，需要重新接受安全培訓，以免累己累人。但估計亦有人有唔同意見，話擔心會影響工人生計。但到底係生計重要啲，定係生命重要啲呢？希望相關人士三思！本人謹此陳詞，希望大家支持我嘅修正案。