20250212「全面檢視特區政府資源運用，優化財政結構」議案

主席，本財政年度政府嘅地價收入只有80多億元，比高峰期下跌1500多億元，係庫房出現財赤嘅其中一個主要原因。不過我喺不同場合都指出，更根本嘅問題在於近10年政府嘅經常開支增長過快，易放難收，一旦經濟情況轉壞，往往會錄得巨額赤字。因此我同其他G19議員都認為，政府滅赤嘅手段應以節流為主，回歸《基本法》規定嘅審慎理財、量入為出原則，全方位嚴控經常開支。

我哋G19早前會見財政司司長，就2025/26年度預算案提出咗8點共同倡議，在此我希望講講當中3點節流措施。第1點係將政府嘅「資源效率優化計劃」加強，由原定要求各政策局同部門每年削減1%嘅經常開支，增加至未來兩年內最少合共削減5%，全面落實後可為政府減省約200億元開支。200億元嘅削支金額睇落唔算多，但因為係經常性開支，對往後每一個財政年度均有影響。

相對於公務員一刀切減薪，削支要求可逼使各部門，認真自行檢視現有嘅工作、服務、程序同人手編配有乜嘢改善空間，係咪可以通過精簡工作流程、重新調配人手、合併重疊嘅架構、調整體過時嘅服務，以及利用創新科技同增加外判等，嚟達致以相同、以至更少嘅人手及資源，為市民提供更優質同高效嘅公共服務，切實減少浪費同濫用公帑嘅情況。

主席，我近年亦多次提出，相對政府部門同公務員系統，唔少公營、法定及資助機構涉及嘅浪費行為可能亦唔少，提升績效同「瘦身」嘅空間可能更大。G19嘅第2項共同倡議，就係全面檢視相關資助機構同基金嘅收支與績效，包括精簡人手及檢討薪酬架構、取消過時嘅服務、合併重疊嘅機構等。

此外，過往攬炒派經常喺本會針對預算案進行拉布，令政府面臨財政懸崖，各個資助機構因此要預留較多儲備應付不時之需，避免服務中斷。隨着行政立法嘅關係同溝通大幅提升，有關風險已大減，政府應要求各個資助機構檢視其儲備水平，將過剩嘅資金回撥庫房，用喺其他更逼切同具效益嘅用途。

G19嘅第3項節流建議，就係改革俗稱「跳point」嘅公務員增薪點制度。增薪點嘅原意，係假設公務員隨着年資及經驗增長，可以更好同更高效咁，處理更多同更複雜嘅工作，因此可取得較高嘅薪酬回報。但久而久之，卻變成不論表現優劣或者貢獻多寡，每年都奉旨跳point，增薪幅度更往往不少於4至6%，導致部分公務員失去咗提速、提效同提質嘅動力。

因此我建議改革相關制度，以更加賞罰分明嘅原則，去獎勵表現優異者，同促使平庸者改進，提升各級公務員嘅積極性同工作績效，達致長遠減省人手同開支。詳細嘅改革建議，有機會再向大家講解。本人謹此陳詞，支持議案。