20250212「守護本港一夫一妻、一男一女的婚姻制度」議案

主席，新任美國總統特朗普嘅好多外交同國內政策，都係為人詬病，甚至係應受譴責，但亦有一點我係認同嘅，就係佢對傳統嘅一夫一妻、一男一女婚姻制度嘅堅持。呢啲其實都係好基本嘅常識同常理，但偏偏就係有啲人忘卻咗、混淆咗，導致美國同部分國家及地區近年出現種種社會敗壞、道德淪忘嘅亂象。

有人認為守護一夫一妻、一男一女嘅婚姻制度，就等於歧視或打壓人權自由，呢個我認為係偷換概念嘅說法。首先，大家都知道人權自由亦並非完全不受限制，前提係唔能夠影響到他人嘅人權自由，以及破壞社會約定俗成嘅正確倫理道德觀念。

其次，我係尊重心智成熟嘅成年人，喺個人同感情生活方面有唔同嘅選擇，但唔代表其他大多數人、同埋政府，要喺政策上支持、鼓勵，以至喺法律上確立一啲大部分市民都認為係有違道德倫理嘅行為。

尤其喺教育下一代方面，據報喺美國某啲學校，連父母都不能直稱為父母，要改稱無分性別嘅「家長」；叫人做夫婦亦可能係不正確，要改口叫做中性嘅「伴侶」；對小朋友嘅成長會造成乜嘢影響呢？

特區政府近年喺多宗有關向同性伴侶提供公共服務同社會福利嘅官司中敗訴，我唔係法律專家，唔清楚箇中因由同解決辦法，但可以肯定係會對我哋嘅道德倫理造成衝擊。政府起碼需要喺教育層面多做工夫，唔能夠簡單一句話尊重法庭裁決同個人嘅選擇，就完全無所作為。

我所講嘅倫理道德教育，唔單止係中小學層面。大學都要做，喺校園內推動正確嘅男女關係同倫理道德觀念，起碼唔應該縱容、鼓吹，以至資助有違呢啲原則嘅活動，咁樣做同維護學術自由、保障言論及思想自由並無衝擊。

喺社會層面，就要由政府帶頭去做，鼓勵同支持一啲守護一夫一妻、一男一女婚姻制度嘅活動，積極維護同宣揚正確嘅中國傳統倫理道德。官員要公開講，時常講，唔好因為擔心會得罪一少撮人，而唔敢講。本人謹此陳詞，支持何君堯議員嘅議案。