20250319「善用香港海島和海岸線資源，推動海上旅遊發展」議案

主席，除咗土地房屋問題，我亦一直關注香港嘅海濱、海岸、海港，以及海島嘅保育、發展同如何善用，發揮更大效益。包括擔任海濱事務委員會委員長達6年，參與咗項海濱長同近海設施嘅規劃及建設方案，亦先後出任咗立法會「研究與海濱相關的政策事宜小組委員會」及《2024年保護海港(修訂)條例草案》委員會嘅主席。所以好感謝劉業強議員今日提出嘅議案，讓議員可以討論相關事宜。

香港擁有長達1,180公里嘅海岸線同多達263個島嶼，係豐富嘅天然同旅遊資源，但過往並無加以善用。例如維港兩岸嘅海濱長廊，經過多年努力，獲接通嘅里數已大大增加，但軟件配套卻未能全面跟上，包括餐飲設施、連接暢達性、與周邊設施嘅聯繫都不足，搞活動又限制多多，跨部門協調欠佳，審批程序繁複等等，都限制咗市民享用美麗嘅維港同海濱，發揮唔到更大嘅旅遊及經濟效益。

要進一步活化海濱，我認為必須善用市場嘅力量，引入更多、同更具彈性嘅公私營合作。唔止係偶爾租借畀商業機構舉辦活動，而係直接引入商業化、市場化嘅管理營運，借助商界嘅創意同商業考量，配合周邊商業設施同經濟活動，將海濱活動搞得更加有聲有色，日夜繽紛，讓市民、旅客同商戶都更能受惠。

香港絕對備條件發展海上生態同島嶼旅遊，近年我去過多個相對遍遠嘅海岸及島嶼，包括沙頭角、荔枝窩同附近嘅小島，景色真係好靚，部分更極具歷史同文化特色，但旅遊配套設施就真係唔夠，包括廁所、指示牌、餐飲，尤其係設備較完備嘅住宿設施稀少，令旅客難以進行較長時間而又舒適嘅深度遊，為當地居民同商戶帶嚟嘅經濟效益大打折扣。唔似海外嘅某啲海岸同島嶼景點，形成群聚及規模效應。

政府依家面對財赤，難以為有關遍遠海岸及海島加建大量設施，但係咪可以更好咁借助市場力量呢？要做出成效，政府相關要求及條款要多加考慮市場情況，為商界拆牆鬆綁，提供利便。例如我早喺10年前就提出關注嘅前石澳石礦場同前南丫島石礦場用地，但到依家依然未獲善用，主要原因之一係政府嘅規條綁得太死，忽略市場情況。

另一例子係大嶼山南部嘅美麗海岸線同海灘，可以媲美好多世界知名嘅海岸景點。但政府定出咗「北發展、南保育」嘅口號之後，就好似變成南大嶼係唔能夠有任何發展，旅客想搵間設施比較齊全嘅酒店都冇，交通亦唔太方便。

部分人擔心多人去就會破壞自然環境，但其實外國同內地好多自然景點都係好受歡迎，只要有效管理就唔會出問題，希望政府可以與時並進，革新思維，更好善用香港嘅自然資源，產生更大效益。本人謹此陳詞，支持原議案及所有修正案。