20250319《2024年空氣污染管制(修訂)條例草案》二讀發言

主席，本人發言支持《2024年空氣污染管制(修訂)條例草案》二讀。草案內容主要分兩部分。第一部分係加強打擊無牌進行指明工序，尤其係會造成空氣污染同滋擾市民嘅水泥生產工序，更好地維護香港嘅空氣質素、市民健康，以及同環境、道路嘅清潔同衞生。

草案嘅具體建議包括：收緊條例早嘅「水泥工程」同「處所」嘅定義，以避免有人透過將生產工序化整為零，以及將部分工序移師至海上、船上進行，嚟規避現行法例嘅監管。另一項建議係授權環保署署長喺符合指定條件下，有權下令封閉涉嫌違規嘅水泥廠，甚或將相關處所斷水、斷電、斷燃氣，以杜絕有人通過提出司法覆核等方法拖延時間，繼續違規生產水泥。

違規進行水泥生產工序，除咗會污染環境同影響市民健康，亦會對其他跟足程序、合規守法嘅同業造成不公平競爭，因此我同大部分建造業界人士，都原則上支持今次修例。但業界同時關注，法例往往係只管到守法嘅人，有心違法嘅人可能會通過種種方法逃避規管，擔心修例會否令現已相當冗長嘅申請審批程序變得更為繁複，會否令經營成本增加同嚴重影響香港嘅水泥供應。

當局喺法案委員會審議期間指出，今次修例並唔會影響整體嘅水泥供應同價格。草案更特別針對喺特殊情況下，例如需要進行緊急維修工程時，對未經批准嘅水泥工序提供法定豁免。對於審批程序，當局亦承諾會致力精簡，將所需時間由過往嘅6至8個月，縮短至只須約3個月，將有關空氣污染測試簡化同標準化等，業界對此係表示歡迎嘅。

我亦借此為從事水泥生產嘅公司，以至整個建造業界講句公道說話。水泥工序無可避免會產生一定嘅灰塵，對鄰近嘅地區、市民同商戶造成一定影響，但亦不可能將相關工序完全禁絕，因為幾乎每一個工程項目，都或多或少要用到水泥。尤其係水泥溝好之後，喺一定時間後就會凝固同影響質量，唔似其他建築材料咁可以集中存放，需要嘅時間先至使用。

我喺審議期間就提出，現時被某啲人用作逃避規管嘅海上生產水泥方法，通過今次修例之後，其實係咪反而值得加以有效規管同推動，以降低營運成本同減少對陸上居民嘅滋擾，同時可以更方便咁，向位於全港不同區域嘅地盤提供水泥呢？另外，係咪可以通過創新科技嘅研發應用，嚟減低水泥生產同運輸過程中造成嘅污染呢？我希望政府同業界都會積極探討有關問題，唔好固步自封，尤其係為官嘅，唔好只顧監管同執法，亦要做好市場促進者、促成者嘅角色。

草案第二部分嘅內容，係根據世界衞生組織嘅建議，更新香港嘅法定空氣質素指標，包括收緊5個現行指標同3個新增嘅指標。有關改動反映香港過去喺提升空氣質素所作出嘅努力同取得嘅成果，因而可以進一步提升相關法定標準。草案亦已訂立過渡條文，訂明喺修例前已獲發環境許可證嘅工程及發展項目，享有36個月嘅過渡期，毋須根據新標準去調整佢哋計劃或重新申請批准，係務實嘅做法，整體值得支持。

草案同時建議簡化相關修例程序，將來政府想再次調整有關法定空氣質素指標，只須以「先訂立、後審議」嘅附屬法例方式處理，毋須好似今次咁，以條例草案方式，經過三讀程序先至修改到。有關做法有助加快修例工作，亦唔會削弱立法會嘅監察權力，同樣值得支持。

喺過去兩三年，立法會審議咗多項有關道路交通安全同車輛規格標準嘅立法建議，未來仲有多幾條草案，內容包括引入自動收費、自動駕駛、自動泊車、電子執法、電子車牌，以及氧能汽車等等，好似每次想改少少嘢，都要經過相當繁複嘅法律草擬同立法審議程序，某個程度拖慢咗香港嘅創新科技應用同發展。

我希望政府喺修訂其他法例時，都會主動檢視一下，對於一啲非原則性嘅法定指標、標準、規格要求等等，係咪都可以好似今次咁，簡化相關嘅修訂程序，提速提效，加快改革步伐。本人僅此陳詞。