20250402「優化輸入人力措施」議案

主席，近年唔少市民都關注香港建造工程成本高問題，箇中原因甚多，其中一個因素係勞工成本。香港人口持續老化，唔少行業都面對人手不足及高齡化，建造業係重災區之一。有關問題亦令到整體生產力不斷下降，再加上種種涉及建築法規同審批流程嘅問題，導致香港建造工程所需嘅時間延長，間接令建造成本進一步增加。

最近勞工界反映，有部分工種嘅建造工人面對開工不足同工資受壓。其一係同經濟及樓市有關，導致私營工程量減少。其二係工人嘅技能出現錯配，唔少建造工人往往只熟悉一兩種工序，較容易受到市道，以及個別政策法規同建造技術嘅轉變影響。

無論係基層工人定係專業、技術人才，我都一直支持本地優先，培訓優先。包括協助技能單一嘅工人增值，學習更多唔同種類嘅建造技術，善用創新科技，以減少人手需求同提高生產力，以及提升行業形象以吸引新血入行。就此，政府同建造業議會已做咗唔少工作，但由於業界估計未來數年嘅行業人手短缺多達2萬至4萬人，適度同針對性咁輸入外勞仍係有必要嘅。

政府喺2023年中推出「建造業輸入勞工計劃」，配額上限為同一時期內最多1.2萬名外勞。計劃推行已近兩年，前後接受咗7輪申請，合共批咗約10,600人，反應比我預期為差。

好多業界公司都反映，該計劃嘅申請及審批程序繁複，而且附帶唔少條件。包括每聘用1名外勞，就必須請番不少於兩名全職本地工人；必須為本地工人提供額外嘅培訓名額；以及必須以本地同等職位嘅工資中位數聘請外勞，並且不能扣減番相關嘅住宿、培訓同中介費用等種種開支，令計劃嘅吸引力大減，導致申請數目少於預期。

故此，對於原議案促請政府檢視相關嘅輸入人力措施，包括檢討工資中位數嘅規定、更彈性咁處理外勞嘅住宿安排等，我係支持嘅。當然進行檢討，唔等於要消取晒呢啲要求同規定，而係要確保相關計劃能夠產生原定嘅成效，同時喺保障本地工人與維持經濟動能之間取得適當平衡。

除咗建造業，香港嘅物業管理業亦長期人手不足。而且物管業受經濟影響較小，人手需求持續上升。但礙於行業形象同難以大幅提高管理費，業界好難出高薪請人，好少年輕人肯入行，所以大家都見到好多清潔工及保安員都係好大年紀。 優化版嘅補充勞工計劃，已容許物管業輸入外勞，但至今申請數目唔多，原因之一係政府嘅外判服務合約唔畀承辦商使用外勞，同政府只容許工務工程利用新計劃聘請外勞嘅政策剛好相反，我希望當局會檢討。本人謹此陳詞