20250416《2025年撥款條例草案》(2025/26年度財政預算案)二讀發言

主席，由我擔任召集人嘅立法會G19，就本年度預算案提出咗8點共同倡議，希望政府能加快節流開源，推動經濟高質多元發展，更好面對嚴峻嘅外圍環境。除咗促請政府加大削減經常開支，亦要求加強公營機構嘅節流提效工作、回撥種子基金嘅過剩款項、檢討各類公共服務收費、將更多體育博彩項目規範化等，好高興大部分建議都獲得司長採納。

對於預算案宣布全體公務員凍薪1年同削減1萬個編制職位，我係支持嘅，但單靠削減編制人手係唔足夠，更關鍵係要提高公務員嘅積極性同效率，促使用更少嘅人手同資源，亦能夠提供更多同更好嘅服務，剛才葉劉淑儀議員都強調咗呢方面。因此，我喺早兩年已促請政府改革公務員增薪點制度，做到更能獎勵表現優良嘅公務員，促使平庸者提升表現。

根據政府數據，過去5年，合共只有65位公務員因表現欠佳而不獲增薪，平均每年只有13人，比例之少，絕非大部分市民所能認可。我亦有要求政府提供過去嘅公務員表現評核數據，係咪好似坊間傳聞咁，個個都攞A，極少公務員會被評為表現欠佳，政府繼續話冇備存相關數據。有關情況及數據顯示，現行嘅公務員增薪點制度、以至整個表現評核同管理制度，係有好大嘅優化空間，以達致善用資源同提升績效。

除咗公務員體系，各個運用公帑嘅公營、法定及資助機構嘅績效亦要提升。事實上，相關機構嘅薪酬開支，近年已超越咗公務員隊伍。我喺預算案建議書提出，政府應該成立一個效率委員會，成員包括外界嘅企管專家，檢視現有各個公營及資助機構嘅工作績效同成本效益，係咪有啲機構可以合併、取消、或者大幅精簡架構同人手，希望司長認真考慮。

主席，政府滅赤應以節流為先，首要係減少濫用同浪費，同時亦都需要以「能者多付」原則適度開源。政府嘅三大經常開支範疇，醫療、社福同教育，過去10多年累計增長幅度高達6成至超過1倍，必須嚴加控制。

當中公營醫療收費改革經已啟動咗，呢個亦我同G19共同倡議之一。部分市民只集中睇加費嘅部分，但其實改革嘅重點係如何善用有限嘅資源，加強對有需要病人嘅保障，更好咁應對人口老化。例如增加急症室收費，係為咗減少濫用同縮短輪候時間。因改革而慳到或者多收嘅錢，亦會全數用番喺病人身上，重點係加強社區基層醫療及夜診服務，避免市民小病變大病；亦會強化對「貧、急、重、危」病人嘅支援，避免基層以至中產市民因「大病致貧」。

教育方面，亦見到局方已從多面節流開源，包括分階段適度調整大學學費同收緊中小學「殺校」政策。當中取消無差別派發2500元學生津貼嘅建議，目的係將資源更精準咁幫助真正有需要嘅學生。

社福方面，過往部分措施畀人感覺，係「養懶人」多於「精準扶貧」，唔少政策都冇充分考慮市場情況與實際成效，有必要進行更全面嘅檢討同改革。

主席，政府近年希望更好借助私人市場嘅力量，包括資金、人手同專業知識，協助當局提速提效覓地建屋同落實各項民生建設，包括喺賣地條款要求發展商興建道路、天橋、以至一啲醫療及社福設施，推出不同模式嘅公私營合作計劃，促使發展商代為興建部分公營房屋同產業設施等等。

不過，要有效善用市場力量，必須先行了解市場。但唔少官員都未必能充分掌握、甚至冇嘗試去了解市場嘅實際運作同最新情況，喺擬訂有關政策、條款同處理審批時，過份着重監察管控，同保障政府及自身嘅利益，忽略潛在參與者面對嘅困難同考量，導致相關政策同計劃欠缺足夠吸引力，喺市場唔明朗嘅時候，推出市場後往往無人問津。

具體例子包括我關注咗多年嘅200億元「購買私人物業作社福用途計劃」，推行5年只用咗1%嘅核准撥款額。主席，我並唔係針對勞福局或社署，其他政策局同部門亦有唔少例子，包括近年多幅政府土地流標、「樂建居」計劃欠吸、一拖再拖嘅多層式高端物流設施，以至被迫中途擱置嘅垃圾收費計劃等等，都係政府對市場、對社會了解不足，處事太過長官意志，政策閉門造車嘅情況。

當然亦有一啲好例子嘅，例如房屋局效法市場做法，為過渡性房屋搞示範單位同睇樓團，有效提升市民對項目嘅了解，釋除合資格居民嘅疑慮。

另外，發展局最近就北部都會區嘅3個「片區開發」試點，以及3個島嶼及海岸旅遊項目，邀請市場提交發展意向書，係一個進步嘅做法，有助政府及早了解潛在參與者對項目嘅憂慮和建議。希望當局能夠虛心聆聽市場嘅聲音，與參與者分擔風險，考慮我提出改以「分成」制度嚟收取地價，改變政府過去太過依賴地價等非經常收益，導致每年預算案嘅結果與預計盈虧出現大幅落差。

主席，美國對我國、包括香港近期發動嘅關稅貿易戰，正如夏寶龍主任指出，係極其蠻橫霸道同荒謬無恥，目的係中斷中華民族嘅偉大復興，破壞特區嘅繁榮穩定。預算案對今年經濟以至政府收支作出嘅預測，相信亦會受到影響，無論係企業定個人都會面對更大挑戰。

面對大是大非，我哋更加要堅定團結，對國家、對香港、對未來有信心，共同努力，克服困難，善用香港嘅獨特優勢，更好把握國家發展帶嚟嘅機遇，令香港經濟可以再次起飛！

本人謹此陳詞，支持《2025年撥款條例草案》二讀同三讀。