20250604「檢視公眾街市發展策略」議案

主席，香港部分公眾街市空置率長期偏高，租戶經營困難，有人歸咎係市民嘅消費同生活模式轉變，多咗幫襯超市，習慣網上以至北上購物。但其實問題早喺呢啲新趨勢出現前已存在，我十多年前首次當選立法會議員時，已開始關注公眾街市嘅出租同管理問題，並就如何善用空置嘅街市檔位及用地提出建議。

公眾街市嘅營運，某程度與其建築設計有關。唔少私營零售發展項目，最旺、最值錢往往係地面街舖。我注意到好多舊式嘅公眾街市，雖然位處旺區，面向行人眾多嘅街道，但大樓建築設計往往將地下舖位封晒，剩番一個唔係好顯眼入口。街市嘅內部設計亦唔理想，舖位細，走廊窄，溫度高，地下濕，充斥各種氣咪，自然難以受到新一代嘅消費者歡迎。

政府早幾年推出嘅「街市現代化計劃」，目的係通過改建以至重建，改善公眾街市嘅硬件設計同設施。但部分街市大樓完成翻新之後，人流同營運未見顯著改善，甚至仲衰過以前。其一係因為施工期太長，部分消費者已習慣咗去其他地方、用其他方法買餸。

其二係硬件改善咗，但軟件管理跟唔上。尤其係當局嘅租務政策，太過僵化及如何與原有租戶協調，而唔係考慮商戶嘅競爭能力，同能否迎合到消費者嘅口味同需要。導致部分用咗唔少公帑翻新嘅街市，因人流減少而陸續有租戶退場，空置情況變壞。

消費者嘅需求轉變，亦令到公眾街市嘅使用人數減少。市民北上消費同網上購物成風，再加上整體經濟不太好，「兩餸飯經濟」嘅興起，唔單止公眾街市嘅租戶營經困難，其他例如連鎖式嘅超市、食肆等都面對相同困難，多種類型嘅實體零售商店都受影響，令商舖空置率上升，租金顯著下跌。

之前政府向立法會申請撥款，喺新界北部興建全新嘅公眾街市，唔少議員都質疑係咪有足夠需求。就算真係有需要起，其建築設計、營運模式、舖位數目同貨品種類等等，都肯定唔可以用番舊嗰套。必須與時並進，革新求變。

上述嘅硬件、軟件同需求問題，其實都牽涉一個核心問題，就係主管官員對市場最新情況了解不足。政府要加強對私人市場運作及面對困難嘅認知，設身處地協助業界解決問題，積極扮演好促進者嘅角色，滿足消費者同商戶營運嘅需要。否則不論啲新街市起得幾靚，舊街市翻新得幾好，市民都未必願意去幫襯，啲商戶嘅生意都唔會做得好好，希望政府多加考慮。對於原議案我係支持嘅，但對修正案嘅部分內容我係有保留。本人謹此陳詞。