20250522「強化香港作為國際旅遊城市樞紐的角色」議案

主席，首先感謝代表旅遊界嘅姚柏良議員提出今日嘅議案，議案內容相當全面，作為建測規園界嘅代表，我會集中講有關旅遊設施嘅建設。

位於西貢萬宜水庫嘅東壩，最近成為好多內地同本地遊人嘅旅遊熱點，每逢假日都塞滿晒人，一度引起嚴重塞車問題。姚議員提出可通過改善鄰近嘅西貢白腊灣碼頭同相關配套，利用水路嚟疏導東壩嘅陸路交通，並順帶推廣白腊灣同西貢嘅其他景點。但據悉有關建議畀局長一口拒絕，原因係擔心喺白腊加建旅遊設施，會破壞當地嘅自然生態環境。

到底應該點做先啱呢？不過原則上我一直認為，發展同保育唔係必然對立嘅，遇到困難應積極尋找解決方案，不應立即就作為不做事嘅理由。

我曾多次批評，香港過往嘅保育政策係「保而不育」、「規而不管」，包括將一啲具生態價值嘅土地列為自然保育區，禁止任何發展，以為咁就可以達到保育效果。結果不單令市民同遊人無法享用有關自然美景，仲往往因為缺乏有效管理，生態環境質素隨時間而變差，甚或助長一啲非法嘅發展同用途。

政府近年改行積極保育政策，希望通過更有效嘅管理同規範化嘅發展，去保育同善用香港嘅自然生態資源。有關政策值得支持，希望可以更快咁見到更多成果。

除咗自然環境，好多旅客亦鍾意造訪一啲有香港特色、融合咗中西文化嘅歷史建築物。政府前日公布嘅9個旅遊熱點項目，亦有包含部分歷史建築景點。香港過去嘅歷史建築保育政策，同樣係「保而不育」，例如用鐵絲網將啲古蹟圍封，只着重保留同安全，但係忽略活化，令市民同遊人難以近距離接觸及欣賞有關歷史建築，未能充份發揮應有嘅經濟效益同歷史文化價值。

政府近年已優化相關歷史建築活化計劃，但喺引入商業元素、發揮經濟效益方面仍然規限過多，導致有啲活化項目推行咗好短時間，就因為虧損嚴重而結業，做唔到好似其他城市，包括內地咁，成功將一啲歷史建築，變身為集餐飲、購物同文創產業於一身嘅旅遊熱點。

政府現正就3個島嶼及海岸旅遊項目，邀請市場提交發展意向書。當中南丫島嘅發展，十多年前亦提出過，但因為缺乏基建配套，投資者計唔掂數而未能成事。依家以「片區開發」模式，叫投資者起埋基建，政府有冇認真評估項目嘅財政可行性呢？

我認為有關項目嘅成功關鍵之一，係政府要摒棄過往將保育同發展放喺對立面嘅心態，切實拆牆鬆綁，積極考慮同促進項目嘅財政、經濟可行性，更要加強對市場情況嘅了解，同香港嘅旅遊發展產生更大嘅協同效益。本人謹此陳詞，支持原議案同各項修正案。