20250702「設立創新體制機制，全速推進『北部都會區核心區』的發展」議案

主席，北部都會區對香港未來發展至關重要，除咗滿足住屋需求，推動創科、物流及教育等產業發展，更有利於加強深港合作，同加快香港融入國家發展。

香港現時面對財赤，要加快北都發展，必須善用市場力量。然而，因為種種內外不明朗因素，不少企業都採取觀望態度。因此，如何增強投資者嘅信心，促使企業參與北都建設，至為重要。

喺過去一段時間，我先後喺不同場合，就如何提速發展北都，提出咗一些意見同建議。首先係要大刀闊斧咁，改革現時相對僵化嘅土地用途規劃制度，避免管得太多、太嚴、同太死。近年大部分嘅規劃大綱圖同地契，對土地用途及發展密度都作出嚴格規限，有某段時期甚至有意見連發展項目嘅外觀、顏色、同用料等都想管埋。

要知道市場係千變萬化嘅，以前興工業，後來興商業，到依家我哋需要嘅係利用土地去強化產業嘅發展。業權人因應市場變化，改變土地用途或地契條款，除咗要修改地契，商討補地價往往要花上以年計嘅時間，亦要向城規會申請有關土地嘅規劃用途嘅改變，涉及大量時間同使費，而且仲未知最後結果會否獲批，令投資者嘅參與積極性大減。

其次係土地批租同收取地價嘅制度，我多次提出應因應現時市場環境，容許發展商分期支付地價，以及引入政府與發展商分擔風險，換取項目落成後分享成果嘅「分成」制度；減少因市道欠佳，而導致賣地及發展項目出現「流標」嘅情況，拖慢整個北都發展。以上改革建議唔止係針對北都，我哋其他香港嘅發展都適用。

對於原議案提議設立一個法定機構，同制訂一條獨立嘅北都條例，希望加快為北都建設拆牆鬆綁，原意係好嘅，但亦有多位議員就相關建議嘅職權功能、適用範圍，以至名稱等提出修正案，可見係有一定不同意見。我代表嘅建測規園業界，亦有人提出過類似建議，但亦有部分人擔心成立多一個機構，訂立多一條法例，未必真正可加快事情推展，有時仲會因快得慢。

事實上，喺我代表嘅業界同其他界別人士推動下，政府已先後精簡咗多項與發展及建設相關嘅法定同行政程序，但唔少人都話具體成效比預期低。法例雖然改咗，程序亦已簡化咗，但如果負責處理同審批嘅官員，處事心態同工作效率都冇變過，繼續只顧做監管者，拒絕扮演「促進者」嘅角色，欠缺對私人市場嘅了解同溝通，咁樣再整多幾個新機構同新法例，都係冇用嘅，都係難以提效提速。

所以，對於特首近日強調香港必須變革、破局，並預告會喺今年施政報告提出「高級官員問責制度」，我同業界係有期望嘅。本人謹此陳詞。