20250724旨在優化立法會運作的兩項決議案

主席，我發言係代表G19嘅18位議員，支持兩項有關優化立法會運作嘅決議案。

《基本法》確立咗香港特別行政區嘅行政、立法、同司法機關嘅職能與權力，各司其職，努力共同建設香港同配合國家嘅發展。立法會作為特區嘅立法機關，必須與時共進，變革求新，不斷優化《議事規則》，確保運作高效、透明，更符合市民嘅期望。

喺過去一段時間，有部分立法會議員忘記咗自己嘅職責同使命，為求一己嘅政治私利，以至某啲外部反華勢力嘅利益，喺《議事規則》裡面狂鑽空子，挑戰法律底線，無所不用其極咁阻撓政府依法施政，企圖攬炒香港，以至公然宣揚港獨，令特區嘅經濟民生嚴重受損，影響社會安全穩定。

隨着《香港國安法》及「完善選舉制度」嘅頒布同落實，立竿見影咁為香港止暴制亂，由亂及治，重新確立《基本法》訂明嘅行政主導同「愛國者治港」原則，令立法會運作重回正軌。

喺上屆立法會任期尾，本會亦通過咗對《議事規則》嘅多項修訂建議，完善立法會嘅規章同運作，提高議政效率，防範再次被人濫用。現屆立法會不僅杜絕咗過去歪風亂象，議會暴力同攬炒拉布絕跡，更以高效、理性、同務實嘅方式，審議咗大量有利經濟、民生同社會發展嘅法案與撥款，成績有目共睹。

然而，市民對從政者嘅要求同期望，只會不斷提高，因此我哋必須持續提升議會效能，確保立法會能為推動良政善治同服務市民發揮更好作用，不斷提升議員嘅績效，本次優化建議正係為咗呢個目標。

決議案聚焦兩大方面，當中最重要係完善議員嘅履職制度，制訂全新嘅《立法會議員守則》，明確議員必須維護憲制秩序、國家安全同行政主導體制。喺提升運作效率方面，《守則》訂明議員有責任出席會議、參與表決、定期提交工作報告，以及遵守應有嘅行為操守標準。

建議亦優化咗原有嘅議員利益申報制度，同相關嘅調查、處分機制，提高咗部分委員會嘅最低成立人數，以及展開職務訪問嘅最低人數要求等，以確保公共資源嘅精準投放。

上述守則同原則，只係對議員表現嘅最基本要求。要贏得更多市民嘅信任同支持，議員必須更積極咁提升自己嘅內涵同表現，令市民更切實咁感受到良政善治嘅成果。

最後，我呼籲所有議員全力支持有關優化建議，並且身體力行、持之以恆咁加強履職，服務市民，建設香港，貢獻國家。主席，本人謹此陳詞，支持兩項決議案。