[:zh]「解除陳淑莊議員職務」議案發言[:]

[:zh]主席，上個禮拜我哋先啱啱辯論完，由25位議員聯合動議嘅彈劾特首議案。今個禮拜，我哋要處理嘅係，分別由黃定光議員及黃國健議員提出，要求解除陳淑莊議員及邵家臻議員嘅立法會議員職務嘅議案。而估計之後跟住又要處理分別針對何君堯議員、鄭松泰議員同林卓廷議員嘅四項譴責議案。

上述總共七項議案，全部都係根據《基本法》提出嘅。作為曾經宣誓擁護《基本法》及遵守香港法律嘅立法會議員，我會嚴格按照相關嘅《基本法》條文規定，嚟考慮是否支持有關議案。當然，我唔會好似有啲議員咁對人不對事，經常搬龍門，有立場而冇原則，我絕唔會對某啲議員就鬆啲，對另外一啲議員就緊啲，我會用番同一把尺去考慮同審視相關議案，而呢把尺就係《基本法》。

不過，雖然呢幾項議案都係根據《基本法》提出，但所引用嘅條文就有所不同。

其中上周嘅彈劾特首議案，係根據《基本法》第七十三條第(九)項提出，指控特首作出嚴重違法或瀆職行為。該項條文未有硬性規定，必須要等到法庭正式裁定特首違法先至可以提出。而即使有關議案獲得通過，亦唔代表特首已被裁定嚴重違法或瀆職，而係需要委托終審法院首席法官組成獨立調查委員會，就相關嘅指控作出調查。因此議員喺決定是否支持有關議案時，主要係考慮是否已有足夠嘅表面證據，顯示特首好可能經已作出咗嚴重違法或瀆職行為。

換言之，上周嘅彈劾特首議案，或準確啲講，應該叫做「啟動調查及彈劾特首程序」議案，係需要議員作出一個有關事實同法律上嘅判斷。

至於今日討論嘅解除陳議員職務議案，係根據《基本法》第七十九條第(六)項提出嘅。呢項條文嘅背景、寫法、啟動有關議案嘅條件，以及通過議案後所產生嘅後果，都同《基本法》第七十三條第(九)項有好大分別。因此議員喺決定是否支持有關解除職務議案時，雖然都應以《基本法》嘅相關條文為依歸，但所考慮嘅因素同準則就有所不同。

《基本法》第七十九條列出咗喺7種情況下，立法會主席須宣告涉事嘅議員喪失議員資格，當中頭5種情況比較簡單直接，包括因嚴重疾病或其他情況而無力履行職務、未經主席同意下連續三個月冇開會又冇合理解釋、喪失香港永久性居民身份、接受政府委任出任公務人員，以及破產。

第七十九條規定嘅第6種情況，就係議員如果喺「香港特別行政區內或區外判犯有刑事罪行，判處監禁一個月以上，並經立法會出席會議的議員三分之二通過解除其職務」，立法會主席就應當宣告佢喪失議員資格。

值得注意嘅係，要啟動有關議案，法院必須已經作出咗判斷，裁定有關議員罪名成立並判監一個月以上。而有關條文並無要求議員，就被動議解除職務嘅議員到底有冇犯到法、犯法背後嘅動機、理念為何，或者有關罪行係咪嚴重到不應或不適合擔任立法會議員嚟作出判斷

陳淑莊議員，因參與2014年嘅違法佔領行動，喺俗稱「佔中九子案」當中，被裁定一項「煽惑他人作出公眾妨擾」，以及一項「煽惑他人煽惑公眾妨擾」罪罪名成立，各判監8個月，同期執行，判刑遠遠超過《基本法》規定嘅判監一個月以上嘅門檻。好明顯，已符合《基本法》第七十九條第(六)項規定，需要被解除議員職務條件。

當然，《基本法》第七十九條第(六)項亦規定，須經三分二在席議員通過議案，先可以解除有關議員嘅職務，並唔係一被裁定罪成及判監一個月以上，就自動要解除職務。

我理解之所以有相關規定，其中一個原因可能係，即使議員被香港以外嘅法院判監，都可以引用有關條文被解除職務。議員同事有可能要考慮相關嘅境外法庭判決，係咪符合香港嘅法治同司法獨立嘅標準呢? 會唔會有未審先判、有違程序公義，甚至涉及政治檢控嘅情況呢? 呢啲都係議員同事係咪支持有關議案嘅合理考慮因素。

不過，「佔中九子案」喺由香港法院，經過公開、公平、公正嘅審訊所作出嘅裁決。雖然喺檢控同審訊期間，有關被告同部分反對人士，曾質疑案件涉及政治檢控，但我留意到喺法院作出裁決之後，香港律師會、大律師公會等法律界人士，都冇質疑有關案件涉及政治檢控或有違程序公義。

主席，我亦留意到，陳淑莊議員已先後就有關案件提出上訴，並排期喺明年2月審理。但根據《基本法》同其他香港法律，法庭作出嘅裁決同判刑一日未被推翻，有關嘅裁決就係合法嘅，就可以引用有關嘅《基本法》條文要求解除相關議員嘅職務，毋須等到上訴審訊結束，甚至終審有結果後先至可以引用。

基於上述嘅理據同《基本法》相關條文嘅規定，我睇唔到點解本會嘅議員，尤其多位有法律背景嘅反對派議員，可以唔投票支持今次呢項議案呢? 除非佢哋係擺明要無視《基本法》，要以人治取代法治，要將以政治凌駕法律，盲目咁護短以求保住佢哋嘅黨友嘅議席。

主席，好多反對派人士都話，冇佔中，就冇「反送中」，對於呢一點，我係較為罕有地認同反對派嘅講法。喺2014年佔領行動爆發之前，香港係一個守法、安全、多元及包容嘅社會。03年七一有50萬人上街，對政府表達不滿，但有關遊行係相當和平及守法嘅。

不過，自從港大法律學院有位副教授提出「佔領中環」行動，提倡以「公民抗命」、「違法達義」、違法堵路等非法手段去爭取民主，並獲得反對派大力支持同配合下，香港就開始變質，社會就開始撕裂，部分市民嘅守法意識就開始崩潰，並間接引發港獨思潮抬頭。

當年啟動違法佔中嘅人士，仲會將所謂嘅「愛與和平」掛在口號，但依家嘅反修例示威者，依家嘅蒙面黑衣暴徒，早已將「愛與和平」拋諸腦後。佢哋強調嘅係仇恨、暴力，甚至戰爭。經過長達半年多，並且不斷升級嘅違法暴力活動，香港唔單止失去咗法治、包容同守法精神，連最基本嘅人身安全、財產保障、發表不同意見嘅自由，以至係坐地鐵、過隧道、行街食飯買嘢嘅自由同權利，都好似冇埋。

每一位立法會議員喺就職時，都曾經宣誓擁護《基本法》，宣誓會遵守法律。其實即使係普通市民都應該奉公守法，何況係身為立法者嘅立法會議員呢? 陳淑莊議員唔單止自己有份參與違法佔中，仲煽惑他人一同參與違法活動，煽惑他人再煽惑更多人去違法，帶頭破壞香港嘅法治同社會秩序，打開咗呢個滿載暴力與仇恨嘅盒子，有份造成香港今時今日嘅局面。

主席，基於以上種種理由，我會支持立法會通過議案，解除有關被定罪議員嘅職務。本人僅此陳詞。
[:]