[:zh]「支援失業及就業不足人士」議案發言[:]

[:zh]主席，受到黑暴、疫情及美國打壓三重打擊，香港經濟嚴重衰退，失業率最新升至7.2%，係03年沙士以來嘅新高。第四波疫情至今仍未完全受控，香港打疫苗嘅工作亦需時，短期內想恢復通關，我個人並不樂觀，預計失業率高企情況仲會持續一段時間，

最受疫情影響嘅行業，除咗旅遊業及餐飲服務業，就輪到裝修、建造業，失業率長期高企喺雙位數，其他行業開工不足、收入大減嘅亦比比皆是。陳克勤議員今日提出嘅「支援失業及就業不足人士」議案，原定係喺3個月前討論嘅，因疫情而延至今，但仍然係相當適切嘅。

然而，對於原議案同部分修正案建議設立嘅失業援助金，我係有唔少疑問同保留，包括乜嘢先叫做失業？咩人先合資格申請？自僱人士算唔算呢？以合約方式提供顧問服務嘅專業人士又點計呢？財爺喺今年預算案，推出獲政府百分百擔保嘅失業人士特惠貸款計劃，立即就有人指出，嗰啲冇被辭職退，但長期開工不足、畀僱主減薪，或者被迫放無薪假嘅打工仔，點解又冇佢哋份？

幫助失業同幫助有需要嘅人，冇人會反對，對於提供失業援助，最重要嘅問題都係細節。邵家輝議員嘅修正案，希望訂明擬設嘅失業援助金只係「臨時」同「短期」嘅，而且只會幫因疫情而暫時失業嘅人士，我覺得係針對問題，唔會好似局長擔心，會好似外國部分制度咁，影響失業人士搵工嘅動力，同埋好似其他社會福利咁擔心易放難收。香港係有必要解決貧富懸殊問題，但單靠失業援助金，未必係最完善同可持續嘅方法。

主席，早喺去年初疫情剛爆發時，我已立即聯絡業界同多次約見官員，睇吓政府可以點樣幫到佢哋。結果大部分業界人士都話，我哋最想嘅唔係政府直接派錢，而係最緊要有嘢做、有工開，令業界可以自力更生。

因此，我提出「快、細、多」嘅口號，要求政府加快推出更多中小型嘅建造工程及顧問項目，協助業界渡過難關，千祈唔好因為一時嘅財赤同經濟逆境，就減少對基建嘅投資。仲有係要加快、加密為公營部門嘅工程及顧問合約付款，以紓緩業界面對嘅資金鏈斷裂危機。

對於私營發展項目，我要求政府簡化程序、加快審批，多啲利用創新科技，以減低疫情及公務員在家工作，對政府工作效率嘅影響。我亦要求政府資助合資格嘅私營企業，聘請建測規園界嘅畢業生同未考到牌嘅年輕專業僱員，避免佢哋「畢業變失業」同喪失在職培訓機會，繼而無法考取相關專業資格，令業界出現斷層。

上述建議已先後獲政府採納推行，特首同財爺亦多次重申，即使喺財赤之下，政府仍會維持每年用不少於1,000億元投資基建，未來更會特別着力簡化與土地房屋發展相關嘅審批程序。對此我再次表示感謝，並期望各項措施可盡快到位、貫徹落實。

主席，國務院總理李克強向全國人大提交嘅年度工作報告，亦強調「就業是最大的民生」。對於內地嘅失業問題，中央政府嘅工作重點係多渠道咁創造職位，去年內地嘅城鎮新增就業職位多達1,186萬個，年末城鎮失業率為5.2%，有關數字喺疫情同美國打壓下，絕對係得來不易嘅。所以我深切希望，特區政府除咗對深受疫情影響嘅市民提供針對性嘅援助外，最重要係採取有效措施，增加就業機會，緩減失業情況。畀條魚佢，不如教佢去捉魚。

我好高興見到，財爺喺今年預算案提出再撥款66億元，開設約3萬個臨時職位，當中約1萬個會預留畀畢業生同青年人。我希望當中會包括建測規園界嘅職位，延續之前透過「防疫抗疫基金」推出嘅資助請人計劃，協助將於今年畢業嘅畢業生、有意從事建測規園專業嘅人士同相關企業，希望可以降低失業率，我認為係勝過派錢。

本人僅此陳詞。[:]