[:zh]就皇崗口岸「一地兩檢」安排議案之發言[:]

[:zh]主席，我係發言支持由保安局局長提出，有關推展皇崗口岸「一地兩檢」安排後續工作嘅議案。

根據網上資料，最早有歷史記載嘅「一地兩檢」安排，原來係喺中韓邊境實施，已經係超過100年前嘅事，之後喺唔同國家及地區嘅陸路邊境都有採用，唔係乜嘢新事物。

至於香港與內地嘅「一地兩檢」安排，首先係2007年開通嘅港深西部通道深圳灣口岸，至今已實施咗接近14年，運作一直相當暢順。喺2018年，廣深港高速鐵路香港西九龍站亦採用「一地兩檢」安排，當年反對派提出嘅種種抹黑同陰謀論，話內地人員會藉此越境執法，拉人返大陸，結果證實完全係危言聳聽，謠言止於智者，謊言止於事實。

因應實施「一地兩檢」所帶嚟嘅效益，我過去以全國政協委員身份提案，建議內地當局研究喺更多香港同深圳嘅口岸實施「一地兩檢」，以提高通關能力同效率，便利兩地旅客及車輛往來，推動深港貨運「東進東出、西進西出」嘅優化格局、推動深港經濟進一步融合發展、推動《粵港澳大灣區發展規劃綱要》提出嘅加快城市基礎設施互聯互通目標。

今次兩地政府藉着重建深圳皇崗口岸設施，提出喺皇崗/落馬洲口岸實施「一地兩檢」安排，並由深圳市政府全數支付相關建造工程費用，對此我當然會全力支持配合，並感謝中央人民政府與深圳市政府嘅支持。

主席，「一地兩檢」安排除咗可以便利旅客往來、縮短通關時間，唔使市民抽住啲行李走上走落，另一好處係可以更有效咁運用土地資源，騰空更多邊境用地作其他發展用途。今次皇崗口岸落實「一地兩檢」，就可望釋放超過20公頃嘅原落馬洲管制站用地。

20公頃用地，對內地嚟講唔算多，但對於寸金尺土嘅香港就相當重要。有人提議將有關用地畀埋科技園公司管理，與鄰近嘅落馬洲河套區創科園一同發展；有人建議用作發展旅遊、購物等設施；亦有人建議用嚟起樓，畀將來喺創科園工作同需要經常往返內地嘅市民居住，紓緩香港嘅房屋短缺問題。不論係邊一個方案，大家都係想善用、盡用呢啲土地，協助香港嘅經濟同民生發展。

今日嘅議案係講「一地兩檢」嘅後續工作，其中當然包括呢20公頃原口岸用地嘅未來用途。剛才發展局局長都講咗，會做相關嘅研究。我希望政府會盡快、盡早展開相關嘅規劃研究，唔好等到個口岸搬咗、拆埋，曬幾年太陽，先至再慢慢諗吓用嚟做乜好，議而不決、決而不行。

其中一個例子係蓮塘/香園圍口岸，嗰度唔係實施「一地兩檢」嘅，而係兩地政府各自興建自己嘅口岸設施。唔同嘅係，深圳嗰邊一早就做好晒規劃，進行發展，做好交通網絡配套，香港呢邊就真係得個口岸，完全冇做好點樣借助呢個新口岸帶動地區經濟。

當疫情消退，加上皇崗口岸實施「一地兩檢」，過關方便咗又快咗，旅客同貨運量隨時大增，到時香港落馬洲嘅道路、鐵路頂唔頂得住呢? 上水站會唔會再次被迫爆呢? 有冇諗過配合深圳嘅東西分流發展，喺新界東起多條鐵路或公路連接落馬洲同市區，以紓緩東鐵嘅擠迫問題呢? 希望運輸及房屋局局長可以諗多啲。

講起邊境土地發展，上個月我喺立法會問咗條書面質詢，要求政府交代近年陸續釋放嘅2400多公頃原禁區用地嘅最新情況。結果不出所料，得600多公頃、即大約四分一嘅原禁區用地有指定發展用途，有超過1000公頃係錄化帶，相等於50個落馬洲管制站用地，令人質疑土地是否得以善用，會唔會我哋又變咗土地大嘥鬼呢?

綠化帶唔係指嗰啲有特殊生態價值嘅地區，嗰啲地方會劃作自然保育區；亦唔係指何俊賢議員關注嘅農地或魚塘，嗰啲已劃作農業用途。根據局長嘅回覆，絕大部分綠化帶其實都係林地、灌叢同草地，長期係冇人理、冇人去、冇人用，雜草叢生，自然地變成綠色，但保育價值唔高。

如果香港有好充裕嘅土地及房屋供應，有多啲荒林野草，養吓昆蟲雀仔、野豬野牛都唔係問題，但係香港嘅土地房屋短缺問題依家極為嚴重，輪候公屋時間愈拖愈長，好多基層市民被迫捱貴租、住劏房，甚至要瞓公園、瞓麥當勞，私樓價格同租金愈升愈高，好多人都上唔到車。連國家領導人都多次忍唔住要出聲，係咪仲有急切性要保留咁多綠化帶用嚟養草養蚊呢?

大家上網睇番40年前嘅邊境照片，當年深圳對岸都有好多山林同農田，依家睇番深圳，幾乎大部分用晒嚟發展，起咗唔少高樓大廈，反觀香港呢邊仲係一片荒涼，甚少發展。我早前批評河套區創科園造價偏高，原因之一係高度限制，要挖深地底以爭取更多發展空間。有關高度限制係源自環評，而有關環評結果係源自附近有唔少保育區同綠化帶，呢個某個程度其實係雞同雞蛋嘅問題。我見創新及科技局局長都喺度，相信佢會明我講乜嘢。

政府話幾年前已經檢視過全港嘅綠化帶，聲稱大部分都冇發展潛力，主因係缺乏基建同交通設施，又係雞同雞蛋嘅問題，你睇下內地點做? 就連美國新任總統拜登，最近都承認美國喺基建方面嚴重落後於中國，必須急起直追。香港特區政府近年都提倡基建先行，但係唔係講一套、做一套呢?

主席，我希望政府可以借今次皇崗口岸落實「一地兩檢」嘅契機，認真檢視香港嘅邊境地區同跨境運輸規劃發展，善用土地資源，切實解決土地、房屋及交通問題，切實改善市民嘅生活同福祉。但係，政府千祈唔好又話因為要作全面檢討，而拖慢落馬洲管制站現址用地嘅規劃發展，要盡快做、立即做。本人僅此陳詞。[:]