[:zh]《2021年收入(印花稅)條例草案》二讀發言[:]

[:zh]主席，本人發言支持《2021年收入(印花稅)條例草案》二讀。

受到美國打壓、黑暴肆虐同新冠疫情影響，香港經濟嚴重衰退，庫房收入大受影響，加上多輪動輒上千億元嘅防疫抗疫及紓困措施，港府財政已連續兩年出現赤字。其中2020至2021年度嘅赤字高達2,325億元，打破歷年紀錄，預計2021至2022年度將會再錄得逾1千億元財赤。短短3年內就唔見咗約3,500億元。財政儲備由高峰期嘅超過1萬1千億元，到明年3月底估計減至約8千億，相當於1年多少少嘅政府開支。

為咗確保政府繼續有能力應對疫情、維持公共服務，以及推出更多針對性嘅紓解民困同振興經濟措施，我喺年初向財政司司長提交嘅預算案建議書，建議政府按「能者多付」嘅原則，引入及調高多項稅收，包括剛剛三讀通過嘅私家車首次登記稅，以及今次草案涉及嘅股票交易印花稅。對於股票印花稅，我嘅建議係買賣雙方各加0.025%，結果財爺決定再加多啲，買賣雙方各上調0.03%。

我提出有關加稅建議之後，收到唔少財經界朋友嘅電話，表示唔支持加稅。代表金融服務界嘅本會議員–張華峰議員，亦喺回應傳媒查詢時，批評建議係「殺雞取卵」，擔心會損害香港嘅國際金融中心地位。而咁啱得咁橋，香港股市喺加稅建議公布後，跟隨外圍市況出現較大調整，有人就揶揄財爺係「自製股災」，要為跌市負責。

好彩，港股之後好快就回復平穩，最近又升番上2萬9千點以上，成交額維持高水平，繼續有多隻重磅新股排住隊嚟香港上市集資，金融市場成為香港喺疫情與經濟不景下嘅逆市奇葩，令到有關加稅會破壞金融中心地位嘅說法不攻自破。正如筆者與許多專家學者指出，印花稅只係股票交易眾多成本之一，而交易嘅成本，只係投資者決定是否買賣港股嘅眾多考慮因素之一。

事實上，根據港交所統計，2020年港股嘅平均每日成交額為1,290億元，較2019年急升48%。今年首季平均每日成交額更高達2,244億元，比去年同期激增85%！如果話股市係一隻會生金蛋嘅雞，呢隻雞嘅雞蛋產量，喺過去大半年就增加咗一倍，但期間嘅印花稅稅率完全冇調整過，令人質疑印花稅嘅高低，與股市成交量係咪存在好大嘅因果關係。

港股成交額喺「疫」市中屢創新高，估計好大程度，係同近年美國對中國嘅瘋狂打壓有關，令不少原定到美國上市嘅內地公司轉投香港，刺激港股整體成交。再加上香港與內地嘅股市互聯互通機制愈趨成熟，涵蓋面愈趨廣泛，令愈嚟愈多「北水」流入香港。即使香港略為調高印花稅，估計呢啲公司同資金都唔會因稅率上嘅些微差異，而轉投美國或其他海外市場。

主席，股票交易印花稅，一直係港府其中一項重要收入來源，喺2019至2020年度嘅相關稅收就超過332億元。按照去年下半年至今年首季嘅成交量推算，本年度嘅股票印花稅總額或會高達500至600億元。政府保守估計今次加稅，可為庫房帶來約120億元額外收入。

120億元可以做到乜嘢呢？立法會財委會喺最近兩個禮拜五，就為獎券基金注資問題拗得面紅耳熱，撥款申請最後僅以一票之差通過。有關注資講緊幾多錢呢？係11億元，但已經涉及40多個社福機構設施。今次調高股票印花稅，估計可以為政府財政與社會民生帶來重大裨益，咁做並唔係乜嘢「殺雞取卵」，而係喺呢隻母雞愈養愈肥、產能大增之下，多一兩隻雞蛋，畀水深火熱嘅基層市民糊口果腹。

喺草案審議期間，有議員曾考慮提出修訂，為今次加稅引入「日落條款」，喺實施一年後自動失效，回復原本稅率，以逼使政府喺一年內檢討有關問題。最後可能因為以大局為重，有關議員並未有提出修正案。但我相信即使冇相關嘅修訂或條款，財爺都一定會不時就相關稅率作出檢討，不斷推出政策，鞏固及提升香港作為國際金融中心嘅地位。

除咗股票印花稅，我希望政府亦會因應香港、國家及全球經濟嘅最新發展，進一步檢討、完善現行嘅稅制同稅項，包括按照「能者多付」、「貴加平減」嘅原則，考慮向天價嘅豪宅交易徵收更高嘅物業交易印花稅；以及研究應否引入其他稅種，包括數碼稅等，為政府增加收入、擴闊稅基，以便向市民提供更多更優質、高效嘅公共服務，向中產市民同中小企提供更多稅務寬免同支援措施。

此外，相對於每1萬元股票交易，只須徵收廿幾蚊嘅印花稅，投資者更加關注自己購入咗嘅股票是否有升值潛力，會唔會買錯所謂嘅「老千股」；一旦公司出咗問題，佢哋能否及時知悉，政府、交易所同相關監管機構嘅監管制度係咪完善等等。

近年香港多咗好多唔同類型嘅投資騙案，有啲徹頭徹尾都係假嘅，根本唔存在相關嘅投資機構同產品，但亦有部分騙案、欺詐案，係由持牌嘅機構或人士、上市公司高層，以至雙方寸通埋一齊嚟呃投資者、呃埋監管機構，呢啲行為先至最影響投資者信心，最損害香港嘅國際金融中心聲譽。我希望有關當局會繼續加緊打擊，不斷完善香港嘅金融市場監管制度。主席，本人僅此陳詞，支持有關議案。[:]