[:zh]「改革房屋政策，解決住屋問題」議案—就修正案發言[:]

[:zh]主席，我一向好尊重自由市場，包括房屋市場，但因為政府係香港嘅主要土地供應者，亦係公營房屋嘅唯一提供者，政府供應多少，對市場產生好大影響。如果政府對市民嘅居住面積同質素冇指標、冇目標，市場就難以持續、有效咁正常運作，無法產生令社會滿意嘅效果。

感謝柯創盛議員同郭偉強議員嘅修正案，兩者嘅大方向我都係認同。柯創盛議員建議將「人均居住面積」指標及「三年上樓」目標等，納入《長遠房屋策略》之內，要求政府每年匯報各項土地及房屋發展計劃嘅進度，對此我係支持嘅。正如我喺主體發言中指出，政策必須有目標、有時間表，官員跟住去做，議員、市民先能有效監察。

對於將過渡性房屋亦納入住屋階梯，我認為過渡性房屋，應該真係過渡性嘅，政府嘅長遠政策目標，應係讓所有有需要同合資格嘅家庭喺合理時間內上樓，令過渡性房屋變成不再需要。

有關重推租置計劃，主要關鍵係要解決公屋喺賣散後嘅維修保養同管理問題。對於現已出售咗部分單位嘅公共屋邨，我係支持重推租置。

對於調整現行物業印花稅以堵塞「假首置」避稅問題，關鍵係何謂「假首置」。樓市「辣招」本應係臨時措施，政府嘅目標應係大量增加公私營房屋供應，令樓價保持喺合理可負擔嘅水平，從而可以全面「撤辣」，咁稅局喺徵收印花稅時，就唔使再分買家係唔係首置。

對於郭偉強議員建議喺賣地條款，訂定單位嘅最細面積，我知道唔少地方都有類似規定。問題係限制到單位嘅最細面積，但好難限制最後個單位住幾多人，亦防止唔到單位出售後，被業主間成多間細小嘅劏房，所以最重要都係供應。

至於不容許新建嘅資助出售房屋業主，透過補價解除轉讓限制。呢個原則我支持嘅，因為當資助出售房屋喺補價之後，變成可自由買賣嘅私樓單位，整體公營房屋供應就少咗，喺需求冇減少之下，政府就要興建更多公營單位去補番條數。

我之前提議過一個做法，就係好似交還公屋單位咁，只容許資助出售房屋業主，將個單位賣番畀政府，然後再由政府按照既定嘅分配同定價制度，賣畀合資格同有需要嘅家庭，關鍵係要釐訂合理嘅回購價。

郭議員要求政府為公營房屋提供整全嘅復修及重建政策，我係支持嘅，但同時促請政府關注私人舊樓嘅維修保養、尤其係「三無大廈」。近年發生嘅多宗舊樓冧石屎意外、致命大火，同疫情下嘅渠管播毒問題，凸顯樓宇老化失修同違規改建，對社會帶嚟嘅安全、消防及公共衞生風險，政府必須更主動、積極地介入處理，唔可以簡單咁話維修保養係私人業主嘅責任。

本人僅此陳詞，支持兩項修正案。[:]