[:zh]「發揮香港在粵港澳大灣區的獨特優勢」議案[:]

[:zh]主席，我發言係支持鍾國斌議員提出嘅議案，以及周浩鼎議員提出嘅修正案。內地近年嘅城市發展及基礎建設，無論喺規模、數量同速度方面，香港都比唔上，但係講到與建築相關嘅專業服務，尤其係管理嘅質量同水平、問責制度等，香港仍然具有優勢，政府應該協助推廣，增強香港業界喺大灣區嘅發揮同機遇。

作為深港合作嘅先行先試區，深圳前海早喺2013年已試行「香港工程建設管理」模式，亦即「專業人士責任制」。剛於今年三月通過嘅國家「十四五」規劃綱要，提出要擴大內地與港澳嘅專業資格互認範圍，深入推進重點領域嘅規則銜接同機制對接。廣東省日前出台嘅政策文件，亦強調要加快提升建築產業現代化同高質量發展，為香港嘅建造業界，包括相關專業諮詢服務帶嚟龐大發展機遇。

香港同內地嘅建築相關專業資格互認工作，早於十多二十年前開始，首先係我做測量師學會會長時落實嘅測量師資格互認，其後再擴展至建築師、工程師同園境師。不過，要令香港業界真正把握到內地嘅發展機遇，空有專業資格互認並唔足夠，仲要有「資質」互認，即係承認香港專業人士同企業嘅工作經驗同規模，准許喺內地執業同開業提供服務，否則就會變成我哋成日講嘅「大門開、小門唔開」。

喺各方努力下，內地喺今年一月起，實施適用於整個粵港澳大灣區嘅《暫行辦法》，容許本港嘅合資格建、測、規、園及工程公司同相關專業人士，通過簡單嘅登記備案程序，即能取得獲內地認可嘅相關資格同資質。至於何謂合資格呢？內地當局會承認特區發展局現有兩份顧問公司名冊上嘅香港公司，變相將喺內地執業嘅「小門」門檻，交畀特區政府嚟制訂。

《暫行辦法》為香港業界進軍大灣區跨進一大步，但由於呢兩份名冊均較側重涉及實質建造工程及相關嘅顧問公司，對於其他建造專業諮詢服務，例如係產業測量、物業估價等等，就唔喺名冊之上，未能受惠於《暫行辦法》。所以我再次促請局方適度放寬及擴大相關名冊，讓更多公司同專業人士，可以更便捷咁把握到大灣區嘅發展機遇。

此外，由於內地嘅城市規劃同土地測量工作，過往主要係政府行為，私營業界嘅發揮空間有限，導致香港嘅規劃師同土地測量師，喺資格同資質互認方面一直進展緩慢。鑒於內地近年已開放部分區、縣同城鎮嘅規劃工作，畀私營業界參與，近月我聯同香港規劃師學會，透過不同渠道，爭取畀香港嘅規劃師及相關顧問公司，喺大灣區有更大嘅發展空間，我希望短期內就有進一步進展。

主席，要有效咁把握國家發展機遇，發揮香港專業界嘅獨特優勢，剩係靠業界同議員爭取並唔足夠，必須有特區政府嘅積極協助，包括向內地當局爭取、與專業學會溝通，相關資訊嘅整理、發放，諮詢、轉介及配對服務，以至直接協助業界提出申請等等。發展局過去已做咗唔少相關工作，希望其他政府部門同樣能積極主動，加快推動。本人僅此陳詞。[:]