《2021年電訊(修訂)條例草案》二讀發言

主席，我發言係支持《2021年電訊(修訂)條例草案》二讀。香港已進入5G時代，5G技術除咗方便大家用手機睇電視、煲劇同打機、畫面質素亦靚咗之外，喺物聯網嘅應用方面，包括智能家居、物業管理、無人駕駛同自動泊車，以至係喺商場購物、餐廳點菜同送餐等不同範疇，都可能會用到5G，令到大家嘅生活方便咗、舒適咗，企業亦都可以慳到人手同成本，同時提高生產力同服務質素。

正正由於5G技術嘅應用愈嚟愈廣泛，對市民生活愈嚟愈重要，對相關傳送設施嘅維護亦都需要加強，以確保5G服務嘅可靠性同穩定性。草案其中一項主要建議，就係加強保護地底下嘅電訊基建設施，包括將喺沒有採取合理措施下施工，而導致地下電訊設施受損定為刑事罪行，違者最高可以判監6至12個月，同罰款2萬5千元至最高20萬元。

政府強調有關罪行同罰則，與現時維護地下嘅供水、供電同燃氣設施嘅法例相若，唔會對建造業界同各類掘路工程造成好大嘅影響。但其實現行嘅相關掘路限制、業界施工前要申請嘅種種牌照、批准同程序已經係唔少，令到有關工程嘅準備及施工時間愈拖愈長，加重咗對市民嘅滋擾同對交通嘅影響，工程成本亦因而高咗。

另一個問題係，承建商同工人喺施工時，往往掘開咗條路，先至發現地底原來藏有各類新新舊舊嘅管道同線路。尤其係喺嗰啲舊區，相關地下設施嘅圖則同起路資料，往往都唔係準確同全面咁反映咗實際情況，令業界擔心會喺唔知情之下破壞咗某啲電訊設施，並因而誤墮法網。

通訊局承諾喺制訂有關指引時會諮詢相關業界，我希望有關工作要做得好啲，做到當局所講，要顧及建造業界喺遵從相關規定時嘅實際情況。相關嘅申請審批亦必須簡易快捷，最好係提供一站式嘅服務，業界去搵單一部門，就可申請晒掘路所需嘅所有牌照同批准，收費亦都應該要合理。

政府亦要同時要求電訊商及相關部門，妥善咁紀錄好佢哋嘅地下設施資料，供申請進行掘路工程嘅公司查閱。最好係放喺構建中嘅空間數據共享平台，畀業界可以上網就可搵到相關資料，避免出現錯誤嘅開挖。

除咗掘路工程，今次草案喺另一個層面，亦同我哋業界係息息相關嘅，就係5G物聯網喺住宅大廈、商場、同停車場管理等方面嘅應用。有關應用涉及嘅傳送範圍同顧客人數等，與用於手機通訊及其他全港性、區域性嘅廣播傳送好唔同，因此現行法例已存在兩套唔同嘅發牌制度同規管架構。 為咗促進相關嘅科技同應用發展，草案建議簡化適用於物聯網服務嘅「非傳送者牌照」嘅申請、審批及上訴程序，呢個大原則我係非常支持嘅，尤其係依家用緊有關物聯網技術嘅公司，有啲可能唔知道係等同電訊服務而需要領牌嘅。呢方面政府同樣要做好宣傳同諮詢，盡量精簡審批，唔好疾礙到創新科技嘅發展，同業界嘅正當營運，務求令到更多市民同企業，可以更簡便同便宜咁，享用到相關新科技帶嚟嘅好處。本人僅此陳詞。