告別議案

主席，我係一位專業測量師，畢業後無論喺政府或私人機構工作，都不離我嘅專業，極少參與政治。直到2011年，我希望用自己嘅專業知識同經驗，服務社會同市民，亦希望團結建、測、規、園四個專業，喺土地房屋同宜居城市建設方面，出謀獻策，改善民生，提升業界嘅認受性同地位，因而決心參選立法會。

有幸得到業界選民嘅支持，我喺2012年首度當選。當年作為議會新丁，又係獨立議員，缺乏令到自己嘅意見同建議得到關注嘅技巧，不過我並冇氣餒，秉持我嘅專業理念同原則，理性務實，是其是、非其非，積極投入議會工作。

好高興不少我之前提出嘅建議，依家已得到政府同不少政黨嘅認同，例如制訂人均居住面積目標、優化置業階梯、將資助房屋售價與收入掛鉤、將新界城鎮化等等。

我亦都好好彩，喺議會內識到多位全心為港服務嘅議員，當然包括G6嘅5位良師益友，對我嘅鼓勵同支持。首任4年嘅議會工作，為我嘅人生帶來難忘、難得嘅經歴，亦令我更加認識香港面對嘅問題。

經歷咗違法佔中等事件，我目睹香港嘅社會及政治每況愈下，經濟受損、建設受阻。2016年連任失敗，我冇就此放棄，繼續以唔同身份服務業界同市民。2018年補選，感謝選民再次對我嘅信任同支持，我成功重返議會，希望喺餘下兩年半任期加緊工作，補回我哋業界因DQ事件而浪費咗嘅一年多時間。

好可惜，喺從返議會之後，我發現攬炒派議員嘅拉布同暴力行為，比上屆更為激烈。大量嘅法案同撥款無法有效率咁審議，對香港經濟及社會民生，包括我代表嘅業界，影響至深。立法會大樓更一度被暴徒攻佔，會議廳被嚴重破壞，區徽被人塗鴉，議會工作幾乎陷於停頓。大樓完成復修後，攬炒派仍不斷阻撓會議，不停點算人數嘅鐘聲、掟臭蛋、撥臭水嘅情景，至今仍然歷歷在目，不能忘記。

不過，喺咁困難嘅環境下，我同業界仍然努力做出成績。包括聯同業界4個專業學會，先後就「明日大嶼」、社區防疫、以及海洋公園與南區規劃成立小組，促成政府採納我哋嘅大量專業建議，證明團結就係力量。覓地建屋方面，我提出嘅精簡發展審批、標準金額補價、「一地多用」原則、釋放祖堂地等，亦已獲政府採納推行。

主席，本屆立法會原定去年9月改選，但其後因疫情及選舉修例工作而押後，令我哋多出一年零三個月任期，加上《港區國安法》實施及攬炒派退場，令到議會運作恢復正常。喺大家議員同事嘅努力下，過去一年通過超過40條法案，120項財務建議；由我擔任主席嘅工務小組，審批咗超過2340億元嘅工程及顧問項目，全部都係創下歷史新高。呢啲項目除咗幫到業界，對香港嘅經濟民生同城市建設亦至為重要。喺呢度我再次感謝國家同中央政府，亦要感謝所有支持香港建設、支持香港發展嘅人士。

主席，今屆會期仲有兩日就完結，12月19日就改選，雖然選舉制度已得到完善，「愛國者治港」原則得以落實，制度係重要嘅，人嘅質素同態度亦不可或缺。我寄語下屆嘅議員，必須尊重專業、堅守原則、勤奮議政、積極建言，維持議會嘅高質、高效運作，有效發揮行政立法互相配合、互相制衡嘅憲制職能。

主席，今日啱啱係我生日，係50歲加埋200幾個月。我嘅願望係好老土嘅，就係祝願香港繁榮穩定、市民安居樂業，兩地早日通關。我再次感謝主席閣下、各位同事同秘書處嘅支持，祝願大家一切順利，有緣再聚，僅此陳詞。