「改革招標制度 扶助本地企業」議案修正案發言

主席，感謝有35位議員就本人嘅議案發言，以及邱達根議員同黃元山議員，就我嘅議案提出修訂。以下係我就兩項修正案嘅回應。邱達根議員嘅修正案，提到現有嘅標書評分制度，未能為中小企帶嚟公平競爭機會，要求政府喺採購科技產品同服務嘅標書中，加入更多支持本地企業嘅條文，呢個改革方向我係支持嘅。

政府過去經常以《世貿採購協定》為由，拒絕喺招標制度加入任何「本地優先」嘅元素，但其實我理解好多世貿成員，包括歐美國家，多年來都以種種方法優待本土嘅投標者。

我同我代表嘅業界，並唔係要求香港實施保守主義，特別優待本地企業，我哋只係希望政府可以積極支持、同扶助本地企業與專業發展，尤其係中小型同初創公司，等佢哋有機會喺較為公平嘅競爭環境下，逐步成長，做大做強，以至走出香港，作出更大嘅貢獻。

「本地優先」元素有好多形式，我哋唔係要排斥外國公司，事實上，好多跨國大企業，都係透過喺香港註冊成立嘅子公司嚟入標，佢哋亦有聘用唔少本地人員，好難話佢哋唔係本地公司。但本地嘅員工、本地嘅專業人士、獲本地專業學會認可嘅專業資格，就好清晰易分，因此其中一種支持本地專業發展嘅做法，就係對聘用較多本地專業同技術人員，以及提供較多專業培訓機會嘅投標者加分。

另一種支持本地中小企嘅做法，係喺一啲合適嘅大型工程及顧問項目中，規定中標嘅總承建商或總顧問公司，須透過「以大扶小」、「以舊帶新」同「技術轉移」等方式，委聘其他獨立嘅中小型公司，負責項目內嘅部分工作。

最近建築署表示，嚟緊會將更多合適嘅建築設計合約，規定總顧問須將部分設計工作，交由屬於第三級別、即較小型嘅建築顧問公司負責。我希望有關做法可以擴展至更多部門、更多項目，包括醫管局同大學等資助機構嘅項目，畀多啲本地中小企參與。

對於黃元山議員提出，喺招標採購制度中引入「環境保護元素」同「社會效益元素」，以推動減廢減排、保障基層勞工同扶助弱勢社群，我都係會支持嘅。但我哋必須小心注意點樣推行，加入有關要求同評分準則，唔會令到成個招標制度變得更為複雜，對投標者嘅技術、資歷同資本要求變得不必要地高，繼而令到本地嘅中小型同初創企業更難參與。喺計算社會效益評分時，唔會傾斜咗向大公司呢。有關問題係必須審慎考慮嘅。本人謹此陳詞，支持兩項修正案。