「對接深圳，規劃共建深港口岸經濟帶」議案

主席，國家主席習近平，日前就香港嘅未來發展發表重要講話，提到「四個必須」，其中一個係「必須保持香港嘅獨特地位同優勢」；咁樣，香港嘅獨特同優勢係乜嘢呢？就係背靠祖國、聯通世界。習主席同時對新一屆特區政府提出咗「四點希望」，其中一點係「不斷增強發展動能」，強調香港要主動對接「十四五」規劃、粵港澳大灣區建設，以及「一帶一路」高質量發展等國家戰略。

有部分人可能覺得，上述講話好似冇乜新意，中央官員成日都掛在口邊。但點解要提完又要再提呢？我認為，第一，係因為好重要，第二，可能係因為有啲人聽唔到、聽唔明，或者係以為自己明，但實際做嘅時候就走咗樣、變咗形。

例如係「保持香港嘅獨特地位同優勢」，有部分香港人，甚至係政府官員，都將佢錯誤理解為：香港所有嘢都係好嘅，都係優勝過內地，所以回歸之後最好乜嘢都不變，特區自成一角，唔使理深圳河北面發生咩事。對於「十四五」規劃、大灣區建設、「一帶一路」等，唔少市民、官員、工商界同專業團體，都話會支持、配合，舉辦大量相關嘅活動同會議，但能夠做到習主席強調嘅「主動對接」、「積極改革」，以及「破除利益固化藩籬」，又有幾多呢？

所以，好感謝我哋G19嘅嚴剛議員，今日提出「對接深圳，規劃共建深港口岸經濟帶」嘅議案，而且係新一屆政府上任後嘅首項議員議案，反映本會對新政府喺加強兩地融合、加快深港對接嘅期頒。

作為建測規園界嘅代表，我想講下兩地嘅城市規劃同建設合作。多年以來我都批評，特區政府進行城市規劃，幅地圖過咗深圳河以北係空白一片，極少考慮兩地發展如何互相配合，以促進經濟、社會同民生嘅發展。例如一啲跨境運輸基建，除咗便利旅客同貨物往返，極少會諗下點樣善用香港獨特嘅優勢，同借助內地嘅高速發展，相互配合，產生協同效應，規劃及推動香港發展，達致多贏成果。兩地相關部門同官員接觸唔多，訊息交換係有嘅，但政策合作嘅層次則甚少，更談不上係共同規劃、攜手建設。

上屆政府喺任期尾段，提出「北部都會區發展策略」，確立「兩城三圈」嘅區域發展概念，打破咗特區規劃以深圳河為界嘅框框，係好大嘅進步，但同原議案倡議嘅「共同建設」同埋「深度融合發展」，目前仲有好大嘅距離。

正如原議案指出，我哋需要有創新嘅機制，包括喺規劃、法律、產業同交通等方面，咁先有機會做到習主席所講，發揮香港「背靠祖國、聯通世界」嘅優勢，與大灣區同整個國家「主動對接」，達致「充分釋放香港社會蘊藏嘅巨大創造力同發展活力」。

本人謹此陳詞，支持原議案。