「強制性能源效益標籤計劃第四階段」議案發言

主席，香港約有三分二嘅碳排放係來自發電，當中近9成嘅電力係用於建築物。而建築物嘅能源消耗最大嘅，大家都知係空調。因此喺香港推行嘅首階段「強制性能源效益標籤計劃」，所涵蓋嘅電器就包括冷氣機。希望藉着提升冷氣空調設備嘅能源效益，減少用電、減少碳排放、同時減少市民同商戶嘅電費開支。

除咗冷氣，原來排第二、第三同第四位嘅建築物能源消耗，分別係煮食、照明，以及製造熱水同冷水。環境及生態局局長今日喺立法會提出嘅決議案，建議將「強制性能源效益標籤計劃」擴展至氣體煮食爐、LED燈同即熱式氣體熱水爐，就係希望市民同商戶喺購買呢3類產品時，作出更精明、更環保嘅選擇，為自己慳番啲電費、煤氣費同石油汽費，支持減排，救救地球。

因此，對於局長嘅議案我當然係支持嘅，但唔代表冇批評。第一係推行速度，呢3類產品早喺8年前，已納入自願性能源效益標籤計劃，點解等到依家先轉做強制性呢？仲係咪需要有長達15個月嘅過渡期呢？局長話15個月嘅過渡期，同第一至第三階段計劃相若，即係又係「行之有效」，唔使改變，咁又講咩提速提效呢？尤其有關自願性計劃已試行咗8年。我希望唔使再等多8年，當局先至推行到第五階段計劃，應該盡快將更多電器同燃氣產品，納入強制性計劃之內。

第二點係本會講親環保議題都提到嘅：強制性嘅措施，各種徵費計劃、強制禁用或回收某類產品等，係有需要嘅，但宣傳教育同樣好重要。尤其係「強制性能源效益標籤計劃」，只係強制啲產品要附有能源效益標籤，唔能夠強制消費者一定要購買能源效益較高嘅產品。

受到全球能源危機影響，香港嘅電費、煤氣費、家用石油汽費等，預計都會排住隊加價，對基層以至中產市民嘅影響係大嘅。但有危亦有機，為政府進一步推動節能減排帶來契機。政府、消委會，相關代理商同零售商，係咪可以多行一步，將能源效益標籤與市民可以慳到幾多錢電費掛鉤，講得更清晰易明呢？

之前我建議將膠袋徵費改為2蚊，都是希望市民少用D膠袋，慳番D錢，話畀市民聽，選用高一級能源效益嘅電器，每月可以幫你慳到幾十蚊、甚至幾百蚊電費，相信效果會好過純粹顯示1級、2級或3級好多。仲可以考慮搵我哋嘅前環境局局長同前天文台台長做代言人，拍番幾套片，教市民點樣選購家電，點樣慳電兼慳錢，相信點擊率一定非常高。本人謹此陳詞，支持議案。