龍門陣 龍七公 劏房租管雞肋 冀能成為歷史

筆者不只一次指出，在年多前通過並實施的劏房租務管制條例，乃食之無味、棄之可惜的雞肋，一方面對弱勢劏房租戶的實際幫助有限，另一方面更可能予人將劣質、違法劏房規範化和合理化的印象。有關注劏房團體早前就批評條例存在種種不足，包括只限加租幅度，但不設租金上限，又批評當局調查慢、執法鬆及檢控少等等。

繼早前會見「全港關注劏房平台」嘅代表，尋日我再約見房屋局同差估署嘅多位官員，進一步了解劏房租務管制實施一年以來嘅情況。

我同唔少人士都關注，因劏房租客未必全面了解法例，而且大多係弱勢社群，可能唔擔向當局舉報業主嘅不法行為。事實上，署方至今僅收到30多宗正式投訴，但政府同事唔係有投訴先做嘢，而係會透過不同部門、市民查詢同其他渠道收集到嘅資料，主動出擊去劏房林立嘅大廈「洗樓」，找出懷疑違法個案，至今正在處理超過1200宗。

對於檢控個案較少，據了解主因係條例實施只有一年，部分業主往往以唔知情作為辯解理由，經署方介入同警告後大部分已糾正。我希望署方繼續努力，更加積極、主動咁協助受到不公平對待嘅劏房租戶。

當局至今收到超過1萬份業主按法例提供嘅劏房租約，預計下個月會公布相關租金數據。我重申有關數字並非合理嘅市場租金水平，不應引用作為劏房嘅「合理租金」。

希望隨着愈來愈多永久性嘅出租公屋、過渡性房屋同「簡約公屋」落成，合法劏房嘅供求得以平衡，租金水平回落至較合理嘅水平，違法、劣質嘅劏房被逐步取締，令到呢條我形容為「雞肋」嘅劏房租管條例可以盡快成為歷史！