「加快輸入人力，補充本港勞動力」議案

主席，受到人口老化、「少子化」及移民潮等多項因素夾擊，香港正出現日益嚴重嘅勞動力不足。我哋建造業界亦係人手不足嘅重災區之一，根據《建造業人力預測報告2023》，現時熟練與半熟練工人已短缺約1.5萬人，隨住未來有大量公營房屋同基建項目上馬，預計4年後將擴大至欠缺4萬人。唔止係前線地盤工人，中高層嘅專業人員、工地監督同技術員等，短缺人數都係以千計嘅。

如果大家有留意開我過往嘅言論，都知道我係一向着重本地優先，多次要求政府同大專院校加強培訓本地人才，可惜進展緩慢，就算依家急起直追，都需要一定時間先見到成效。再者，依家情況係整個香港、大部分行業、職級同工種，都面對人手短缺，多咗人加入某個行業，可能又會加劇另一啲行業嘅缺人問題。所以，適度，適切、規範化咁輸入外來勞動力，係各界都不能迴避。

代表勞工界嘅議員擔心增加輸入外勞，會損害本地工人利益，但較少聽到佢哋講輸入外勞對整體社會、全港市民帶嚟嘅效益。又講番建造業界，如果人手長期嚴重不足，不僅無法做到政府要求嘅提量、提效、提速覓地建屋，增加基建及社區設施，盡快解決香港嘅房屋及交通等問題，仲會導致工程造價飆升、施工期拖長、容易出現工程質量同工業安全事故，後者我喺尋日嘅職安健草案二讀時已講過。

今朝我就「提升公共交通服務表現」議案發言亦提到，最近嘅公交服務加價潮，仲有的士司機老齡化引發嘅安全隱患等，或多或少亦係同運輸業人手短缺有關。仲有旅遊業嘅接待能力不足，航空公司嘅運力遲遲無法復常；好多企業有生意都做唔切，有訂單都唔敢接；仲有大家去餐廳食飯貴咗，等上菜同埋單嘅時間都耐咗，往往都係同請唔到足夠人手有關。

對於影響本地工人嘅憂慮，睇番新加坡、多個中東國家、以至美國同部分歐洲國家，近年都係依賴大量輸入外來勞工同新移民，嚟補充本地嘅基層勞動力，讓本地居民擔任工資較高、前景較好，有較多時間進修、增值、同享受家庭樂嘅工作，促進社會嘅升級轉型同工人嘅向上流動。反而係一啲長期抗拒輸入外勞嘅國家，就因為人口老化同勞動力短缺加劇，令經濟逐漸失去增長動力，好多社會民生同基本服務都受到影響。

所以，不論係從「不斷增強發展動能」，定係「切實解決民生憂難」嘅角度，增加同加快輸入外勞，都係刻不容緩嘅。本人謹此陳詞，支持原議案同各項修正案。