「輸入內地電力，平抑香港電費」議案

主席，受到地緣政治因素影響，世界各地嘅燃料價格，包括電費，近年都大幅飆升，令唔少市民同企業苦不堪言。香港嘅電費加幅都唔細，但相對好多地方已唔算最好貴。喺部分國家同地區，仲不時因為能源供應短缺而停電，影響市民生活同企業營運。香港電力供應嘅穩定性、安全性同可靠性，位於世界前列，對香港作為國際金融中心，以至其他產業同企業嘅發展，係相當重要嘅，係不能夠唔重視嘅。

香港電費上升，另一原因係環保、減碳方面嘅要求。為咗達致2050年之前實現碳中和嘅目標，兩間電力公司近年都逐步減少燃煤發電，改用天燃氣等較為潔淨嘅能源。有關轉變涉及不少投資，亦令發電成本及電費上升。正如我之前多次指出，環保係有必要嘅，但大家亦要明白，環保係有成本、要付出嘅。

原議案提出兩大方向去控制電費增幅。第一係逐步開放電力市場，增加輸入內地電力嘅比例。呢方面政府係有做嘅，包括提出喺將軍澳132區興建電力接收站。有關計劃遭到部分地區人士反對，擔心會影響景觀以至居民健康。希望政府會做好解說工作，同時努力向內地爭取更多價格同來源都穩定嘅電力輸港。我亦希望支持增加輸入內地電力嘅市民同議員，同時會支持政府增建相關嘅配套同設施。

第二個方向係檢討《管制計劃協議》，包括降低准許利潤、檢討燃料費調整機制、提高兩電嘅營運及財務透明度等。兩電嘅准許利潤依家係8%，低於之前嘅9.9%，但好多市民都覺得仲係相當高，尤其呢8%嘅利潤，基本上係零風險嘅。

當然我亦明白，任何更改協議條款，都要協議雙方同意，但都期望政府能盡力幫市民去爭取最好嘅調整。因此對於林筱魯議員嘅修正案，刪除咗原議案內「降低准許利潤」嘅字眼，我認為會令有關檢討失咗焦點，縮窄咗檢討嘅範圍。

主席，要紓緩電費加價壓力，除咗以上兩個方向，其實仲有第三個方法，而且係更加環保、更加立竿見影嘅，就係減少用電。就此，網上已有林林種種嘅影片，教大家點樣用少啲電，從而交少啲電費。其中一個做法就係安裝智能電錶，以協助用戶好好管理自己嘅用電量同最佳嘅用電時段。我知道兩電已幫緊用戶安裝同更換智能電錶，但係咪可以再做快啲、做多啲呢？政府可否提供更多協助，更大力咁去推動呢？

從整體社會層面，要做好高峰用電量嘅管理，鼓勵同協助市民與企業，唔好喺同一時段大量用電，繼而要兩電作出更大嘅投資，嚟滿足最高峰嘅用電需求，最終導致電費不必要咁上升。有關工作唔可以單靠電力公司去做，政府要扮演更加積極、主動嘅角色。本人謹此陳詞。