「推動釋放潛在勞動力」議案

主席，政府上周公布「行業輸入勞工計劃」，以本地勞工優先嘅原則，針對多個人力明顯不足嘅行業，輸入最多2萬名非本地勞工。當中建造業佔最多，有1萬2千個配額。我同我代表嘅建測規園界普遍係支持嘅，因為業界嘅人手短缺情況實在係太嚴重，導致唔單止做唔到政府提出嘅提速、提效、提量覓地建屋，可能連最基本嘅施工質量、完工時間，以至工業安全都會受到影響。

不過，我喺唔同場合同議案辯論都強調，輸入外勞係有需要，但加強培訓同留住人才係更重要，當中包括今日議案提出嘅「釋放潛在勞動力」。我早喺去年嘅預算案同施政報告建議書，已要求政府推出政策措施同埋稅務誘因，去鼓勵一啲家庭主婦同退休人士重投勞動市場。對於釋放婦女勞動力，我相信好多議員都會講到，我今日會集中講有關退休人士重返職場嘅問題。

隨着醫學進步，市民更加着重運動同保健，好多年過60、甚至達到70歲嘅香港人，身體狀況都相當好，好似我咁，70歲就嚟喇。喺合適條件下，畀呢啲人士繼續工作，一方面可以為社會及有關企業作出貢獻，另一方面亦讓到有關長者可賺取一定收入，甚至當作打發時間都係好嘅，等佢哋嘅退休生活冇咁悶，擴大社交圈子，對身心健康都有好處，長遠亦都有助減輕政府嘅醫療同社福開支。

呢種安排，喺內地叫做「返聘」，泛指以非長期聘用嘅方式，僱用一啲退咗休或已屆退休年齡嘅員工。返聘嘅人士一般知識豐富，經驗充足，但體力同拼摶程度可能唔及較年輕嘅同事，比較適合一啲非全職、顧問性質同埋內部培訓嘅工作。

喺內地已有𣎴少研究同案例，講述點樣善用返聘人士，當中嘅優點、缺點同需要注意嘅問題等等。香港並冇法定退休年齡，至於非法定嘅指定退休年齡，亦只有政府、部分公營機構同大企業有所訂定。政府早幾年探討過一刀切延長公務員退休年齡，但亦都有唔少人反對，擔心會影響退休金發放同年輕同事晉升。其實私人企業同政府都係關注同樣問題。

如果能夠喺香港引入比較規範化嘅返聘制度，由政府同大企業牽頭，向中小企及社會大眾積極推廣，再加上適切嘅配套同誘因，包括稅務優惠同相關退休福利嘅安排，相信可以吸引更多退休人士重投職場，增加整體勞動力，協助香港應對人口老化。

對於梁子穎議員嘅修正案，建議調高申請公屋、居屋、同各類公共福利金嘅入息上限，以鼓勵相關人士就業。有關問題我認為係相當複雜同有爭議性，涉及整個公屋富戶政策、居屋嘅抽籤制度、各類社會福利嘅公平性同可持續性等等，係唔應該借呢個議案辯論，好倉卒咁作一個決定，必須小心謹慎咁去研究，所以我係唔會支持有關修正案。