「政府帶頭檢討外判制度」議案

主席，我同建測規園業界，一向關注政府及各個公營、資助機構嘅採購及招標制度。早喺2012年首次參選立法會，我已要求當局進行檢討同改革。喺今屆立法會我提出嘅首項議員議案，就係要求改革政府嘅採購及招標制度，當中亦包含外判制度。建議重點包括降低「價低者得」嘅比重，更加着重創意、創新同高質量嘅服務，使到中標者可取得合理嘅費用，以及引入「本地優先」同扶助中小企嘅元素等，喺各黨派議員支持下通過。

不過，對於黃國議員提出嘅原議案，部分建議同措詞我係有保留嘅。議案促請政府帶頭檢討及改革外判制度，「將有實際需要嘅崗位改為長期聘用」，我認為係有問題嘅。如果真係要將所有有實際需要嘅崗位，讓所有薪酬源自公帑嘅僱員，都轉晒做長期聘用，咁就唔係改革外判制度咁簡單，而直情係取消整個外判制度。

眾所周知，相對於長期聘用模式，外判制度係其優勢同好處，包括更有彈性嘅服務；令工作更有效率；可以引入不同嘅專業技能、創意思維、創新做法、更貼地嘅市場觸角等等。取消外判制度，轉晒做長期聘用，變晒好似全部由公務員提供，唔單止會加重庫房同納稅人嘅長遠財政負擔，仲可能會影響好多公共服務嘅效率，有違習主席提出嘅「將有為政府與高效市場更好結合」。

有部分公共服務同工作，更係必須以外判方式提供。例如修橋築路同建屋，建造業界，包括我代表嘅建測規園專業，大部分人都係以不同形式嘅外判合約提供服務。如果要政府請晒所有承建商、分包商同顧問公司，將所有建築工人及相關專業人員變晒做長期聘用，甚至係公務員，現時僅餘嘅六千多億元儲備，相信好快就會用盡；北部都會區同交椅洲人工島等大型發展項目，落實時間亦將會大影響同延後。

原議案亦提到，要「讓薪酬源自公帑嘅所有僱員，都能夠享有合理嘅收入，和家人過上體面嘅生活」。我好支持要讓外判服務嘅僱員，仲有僱主，都享有合理嘅收入，但唔應該講到，好似做唔到長期聘用、做唔到公務員，就唔能夠過上有體面嘅生活。我認為最重要係檢討同優化外判制度嘅條款同監管。

故此，我同全體G19議員，雖然並唔反對檢討外判制度，包括如何讓僱員同僱主享有合理嘅收入，但係就唔會支持黃國議員嘅原議案。由於兩項修正案並冇修訂原議案中相關有問題嘅字眼，所以我哋亦都唔會支持。本人謹此陳詞。