施政報告致謝動議 第一節辯論

貫徹「一國兩制」、維護國家安全、着力提高治理水平

主席，我發言係支持施政報告致謝議案。首先，正如李家超特首日前指出，香港要爭取高質量發展，必須居安思危，慎防黑暴捲土重來，亦要防範「軟對抗」。今年施政報告將國家安全放喺第一位，提出喺明年內完成《基本法》第23條立法、就關鍵基礎設施嘅網絡安全展開立法，我係非常支持嘅。

對於報告嘅整體內容，我形容係「內容涵蓋廣泛、成效翹首以待」，採納咗我同業界多年來提出嘅多項建議，制訂咗多個發展藍圖同成效指標，但能否讓市民盡早享受到有關成果，仍有待各界嘅努力。

現屆政府強調以結果為目標，各個政治問責官員同部門首長，我認同係相當團結同積極有為，但要將報告內嘅各項政策措施有效落實，令市民感受到成效，全港公務員都要齊心努力，提升績效，唔好再抱住少做少錯、唔做唔錯嘅處事心態，喺跨局、跨部門協調方面，避免政出多門、各自為政嘅官僚文化。

去年施政報告提出改革公務員管理制度，我同好多市民都支持。當中解僱表現持續欠佳嘅公務員嘅機制，已於今年9月落實簡化。但對於表現出色嘅公務員，嘉許方法唔應該只有「行政長官表揚榜」。公務員嘅表現評核同薪酬調整機制必須改革，希望特首會將有關改革納入議程，從制度上着力提高政府嘅治理水平，更好地獎勵表現優良嘅公務員。