施政報告致謝動議 第二節辯論

不斷增強發展動能

主席，香港經濟疫後復甦步伐未如理想，財赤擴大，儲備減少，令到唔少人擔心庫房係咪有足夠財力，去推動如北部都會區同交椅洲人工島等大型發展及基建計劃。

我同業界一直強調，新土地嘅開發、新市鎮嘅發展、同基建嘅興建，對香港長遠經濟發展同改善社會民生，係好重要同必須嘅投資。當年嘅玫瑰園計劃就係最佳例子，當中新機場嘅建成，係過去20年來為香港帶嚟龐大嘅經濟同社會效益。我哋唔應該因為一時嘅經濟同財赤問題，而減少投資未來。尤其喺私人市場放緩之下，公共基建投資更加不能放慢，否則會陷入更嚴重嘅經濟收縮循環。

對於施政報告提出，成立由財政司司長領導嘅「大型發展項目融資架構」，為北部都會區及人工島等大型項目探討不同嘅投資同融資方案，我同業界都非常支持。

要貫徹落實習主席提出嘅「將有為政府與高效市場更好結合」，剩係設立相關架構並唔足夠，仲要改變部分部門同官員嘅處事心態。唔好只做「監管者」，要同時做好「促進者」嘅角色，一起努力達成共同目標。此外，公務員除咗要加強認識國家發展，亦要加深了解市場運作，豐富自身有關經濟、商業同科技發展嘅知識，使到特區嘅發展效能不斷增強。