《的士司機違例記分條例草案》二讀發言

主席，香港嘅的士服務，除咗存在制度問題，亦有少數害群之馬，即係俗稱「黑的」司機嘅「劏客」問題。剛才三讀通過嘅《2023年道路交通法例(提升個人化點對點交通服務)(修訂)條例草案》，嘗試透過引入「的士車隊」制度，增加行業競爭同營運嘅靈活性，從而提升整體的士服務嘅質素同競爭力。依家恢復二讀嘅《的士司機違例記分條例草案》，就係希望通過引入相關記分制度，嚟加強打擊「黑的」問題，從而提升香港的士司機嘅整體質素同形象。

草案建議將11項與的士司機相關嘅罪行，包括濫收車資、拒載、兜路同干擾咪錶運作等，列為條例訂明嘅「表列罪行」。的士司機一旦被裁定干犯有關罪行，會按嚴重程序被運輸署署長記低3分、5分、以至最高10分。如果某位司機喺兩年內被記滿15分，署長就須向裁判官申請將該人停牌，為期3個月至6個月不等。不過被記分嘅司機，亦可透過修讀「的士服務改進課程」，嚟扣減一部分嘅記分。情況類似依家針對一般駕駛者嘅交通違例扣分制。

有部分的士司機認為，現時佢哋觸犯個別嘅「表列罪行」，已經會受到應有嘅法律制裁。如果案件性質好嚴重，法庭現時已有權直接判佢哋停牌。點解仲要係依家嘅罰則之上，再加多一套記分同停牌制度，要佢哋雙重受罰呢？

究其原因，主要係因為香港嘅「黑的」問題確係相當嚴重，但法庭量刑時往往只睇個別案件同被告嘅情況，畀人感覺係一般判得比較輕，往往只判罰錢，較少會判監，亦好少會直接判停牌。

久而久之，部分「黑的」司機可能會將有關罰款額，當作日常營運成本，抱住僥倖心態，繼續違法劏客，連累一眾奉公守法嘅良好的士司機都受到影響，對行業發展造成打擊。再者，從另一角度去睇，如果的士司機係奉公守法，就根本唔需要擔心有關記分同停牌制度。因此，我對今次立法嘅原則係支持嘅。

不過，亦有唔少的士司機反映，部分嘅「表列罪行」，例如拒載、兜路、未有將車駛至乘客指定嘅地點等，有時係存在一啲灰色地帶，擔心記分制會增加咗的司機同乘客之間嘅爭拗同投訴，令到一啲無辜嘅司機被記分，甚至停牌。

政府已多番強調，執法部門會經過深入調查，有足夠證據同定罪機會之下，先至會檢控涉嫌違法嘅司機，絕對唔係一有投訴就告人。署長亦只會喺涉事的士司機，被法庭裁定罪名成立之後，先至啟動記分及停牌程序。過程中被定罪同被記分嘅司機，亦有權提出上訴，以至喺最後階段向裁判官申請豁免停牌，喺法律上同制度上已有所保障。

然而，為咗減少爭拗同無理嘅投訴，我建議政府可以向的士業界提供一啲指引同例子，喺扣分制實施前進行公眾教育宣傳，講解到底乜嘢行為先構成違法嘅拒載同兜路，司機遇上塞車、或者乘客有啲無理要求，例如要求喺禁區上落客嘅時候，應該點樣應對呢。

政府亦可以參考一啲地區嘅做法，善用網絡科技，強制的士必須喺車廂內安裝中央雲端攝錄系統，以保障乘客同司機嘅權益，令到乘客、旅客、司機、車主、以至相關保險公司都更加安心。

主席，即將引入嘅「的士車隊」服務，乘客可以透過營運者設立嘅網上平台，預約的士服務同合法咁進行議價，包括唔按咪錶收費同提供其他增值服務。政府希望通過引入競爭，提升包括非車隊的士在內嘅整體行業水平，但亦有部分非車隊的士，覺得政府係想佢哋自生自滅，自然淘汰呢？好似冇乜關顧佢哋。佢哋其中一項訴求，係由政府設立一個統一嘅網約平台，供所有非車隊的士使用，同時取締非法嘅網約平台，令佢哋可以喺更公平嘅環境下與的士車隊競爭。

對於設立官辦嘅網約平台，係咪最合適同最有效嘅方法，大家可以再作討論。不過我認同，好似局長尋講，會深入去睇睇。對於坊間嘅各個的士網約平台，政府唔能夠完全唔理。例如係咪最少要有一啲官方認證，以便乘客、尤其係遊客辨識，邊啲平台提供嘅服務係合法，而唔會預約咗啲「黑的」或非法白牌車。

此外，為免再次出現有大量旅客，喺郵輪碼頭大排長龍，等幾個鐘都等唔到的士嘅情況，係咪應該容許的士喺某一啲指定地區載客時，可以收取附加費呢？希望政府可以認真咁諗下，而唔係剩係識得以記分同停牌等方法，去懲罰啲的士司機。要透過提供更適當嘅誘因，嚟促使行業提升服務水平，同時吸引更多新血入行。

本人謹此陳詞，支持草案二讀同三讀。