「善用土地資源，加快發展離島地區」議案

主席，我哋成日話香港地少人多，唔夠土地，但正如葉劉淑儀議員喺原議案指出，包括大嶼山在內嘅多個離島，現時尚有大批土地未被充分利用。點解咁大嘥呢？我認為主要有兩大問題，第一係規劃問題，第二係基建配套問題。

以大嶼山為例，現時約有四分之三嘅土地都被劃作郊野公園，想用作其他用途，會受到嚴格限制，申請耗費亦需時。立法會早前審議將紅花嶺列為法定郊野公園嘅附屬法例，我再次提出點解香港嘅郊野公園面積，咁多年嚟都只有加，沒有減。

主席，我係注重環保，支持將具備較高生態價值嘅土地加以保育，但政府同時亦應檢視固有嘅郊野公園用地，係咪全部仍然具有高生態價值同值得保護呢？係咪有小部分土地可以因應時代變遷同社會需求，而作出用途上嘅改變呢？

香港嘅離島發展受限，另一主要原因係缺乏基建配套，尤其係與市區接駁嘅交通基建。青衣島同鴨脷洲以前都係離島嚟嘅，但經過多年來嘅填海及道路、鐵路發展，依家已變成市區嘅一部分。大嶼山現時已有青嶼幹線、東涌綫及機場快綫連接港九市區，仲有屯赤隧道及港珠澳大橋接駁大灣區，但由於島內嘅道路網絡及其他配套欠完整，至今只東北部嘅少量土地得以發展。

政府喺2017年提出「北發展、南保育」嘅可持續大嶼發展原則，但7年過去，仍未見有實質成效。「北發展」仍局限喺新機場同東涌，未能善用耗資達千億元嘅港珠澳大橋，有效利用土地和基建，積極推動更多產業嘅發展，例如易志明議員提議嘅物流產業。「南保育」亦都依舊係保而不育，大嶼山嘅豐富天然資源未獲積極利用，增加對香港嘅經濟效益，例如嚴剛議員提到嘅旅遊、康養、環保及新能源產業。

另一個較具潛力嘅離島係南丫島，距離港島市區好近，當中部分土地嘅生態及用途亦早已改變，包括前南丫石礦場用地。早喺10年前，當時我以發展事務委員會主席身份，率領立法會代表團考察當地，與政府官員同島上居民，探討如何加快整個南丫島、尤其係前石礦場用地嘅發展。但10年過去，當地發展仍係原地踏步，實在令人失望。

主席，最近樓市回落，多幅土地流標，有人認為香港已唔需要咁多土地，單靠北都發展就已足夠，建議推遲以至擱置交椅洲人工島計劃，我個人並唔認同有關睇法。首先，經過回歸二十多年來嘅教訓，香港係有必要建立充裕嘅政府土地儲備，除咗用作改善香港嘅居住環境，對於推動產業發展亦非常重要。另外，相關嘅建議運輸基建，對於將大嶼山同港九市區、北部都會區、以至整個粵港澳大灣區串連起來，亦會起到關鍵作用，應該支持有關項目推展。

本人謹此陳詞，支持原議案及各項修正案。