「調整股市樓市政策，增強發展動能」議案

主席，雖然政府已喺去年10月嘅施政報告，宣布放寬大部分樓市「辣招」，但樓價未見較顯著嘅反彈，估計主因包括息口高企、銀行嘅借貸政策、經濟復甦步伐未如預期，以及外圍市況同地緣政治問題等。

展望新一年，有人估計息口經已見頂，甚至有望於短期內回落，但外圍嘅不明朗因素仍然相當多，包括俄烏及以巴戰事、朝鮮局勢、美國大選等等。本地因素方面，經濟增長動力仍然偏弱，政府持續增建公營房屋，私人市場累積以萬計嘅可賣未賣單位。喺眾多內外負面因素夾擊下，市場對前景信心不足，有關因素都可能導致去年有多幅土地流標，多個補地價項目亦因政府同業主睇法分歧，而遲遲未能達成協議。

因應市場情況，今年首季嘅賣地計劃唔會推出任何住宅或商業地皮，有關做法同背後嘅考慮因素我係理解嘅。不過亦有唔少人憂慮，暫停賣地不單會減少庫房收入，加大財赤，亦會影響中長線土地及房屋供應。

回顧歷史，相信大部分人都認同，政府當年喺金融風波後一刀切、長時間暫停賣地，造成咗唔少後遺症，包括住宅樓價飆升，劣質劏房同納米樓湧現，並因而衍生咗種種社會以至政治問題。新增嘅商業用地不足，亦削弱咗香港經濟同企業嘅競爭力，窒礙咗一啲新興產業嘅發展。

我希望政府唔會重蹈複轍，因此建議當局會否考慮優化現行頗為僵化嘅賣地制度，引入項目「分成」機制。即係發展商因應市場有較多不明朗因素，而訂出一個較保守嘅項目未來收入預算，並向政府支付前期賣地價。當項目完成，實際收入超出賣地條款訂定嘅收入，超出愈多，政府嘅分成比例就愈高。當然相關嘅分成要求，將會喺賣地條款列明，以便投標者釐訂將於前期支付嘅建議地價。

有關做法並非全新事物，現時市區重建局同港鐵公司都有採用類似模式。分成制度可讓政府同投標者，共同承擔未來市況變化嘅風險，但如果市況𨍭好，政府亦能分享收益。相關做法亦可應用喺補地價機制，分成比例及項目收入，可按市況同地塊情況而訂定。我喺早前嘅預算案諮詢會，已向財爺提出咗有關建議，希望政府會認真考慮，共同應對當前嘅困難同多變嘅內外政經環境。

最後，有意見要求政府即時、全面撤辣，以至全面取消股票印花稅，我係有保留嘅。第一係樓市同股市嘅起落，印花稅成本只係其中一項影響因素，而且唔係最重要嘅因素，但每年數以百億計嘅股票印花稅收入，對政府落實各項經濟同民生措施就非常重要。

部分辣招亦可以再放寬嘅，尤其中細價上車盤嘅印花稅稅率可考慮再調低，但一啲上億元嘅超級豪宅交易，以及針對短期炒賣活動徵收較高稅率，就可能應該保留甚至再調高。本人謹此陳詞，支持3位G19議員提出嘅原議案及修正案。