《維護國家安全條例草案》全委會第一次發言(潛逃者)

主席，喺《維護國家安全條例草案》嘅審議過程中，委員就草案內容提出咗唔少意見同建議。政府認真審視後，從善如流，廣納意見，並且非常高效咁，提出現正審議嘅委員會階段修正案。

修正案中文版有91項條文，涉及20多組修訂建議。英文版就仲多，包括一啲純粹針對英文用詞嘅修訂，有助英語讀者更準確理解條例內容。在此我感謝保安局同律政司同事嘅努力。

草案第86條訂明，某人被控危害國家安全罪行，並已被法庭發出拘捕手令，如保安局局長合理地相信該人並非身處香港特區，便可刊憲指明該人為「潛逃者」，並對該潛逃者及其相關人士，施加一系列懲處同限制；包括撤銷潛逃者嘅特區護照、吊銷佢喺香港嘅各種法定專業資格同董事職位，以及禁止任何人向佢提供資金等等。

不過，草案原建議必須喺法庭發出手令最少6個月後，局長先可以指明有關人士為潛逃者，而施加其他禁令。呢個6個月嘅規定，令我同唔少委員都大惑不解。因為現實話畀我哋知，唔少呢類潛逃者逃離到外國後都相當高調，不斷以歪理唱衰香港，喺網上煽惑他人進行各類違法行為，以至呼籲外國制裁中國同香港等等。對於呢啲無恥之徒，點解仲要畀6個月時間佢同佢哋嘅同黨、支持者等，去嘗試將資金調離香港，以及進行其他有利佢哋繼續反中亂港嘅操作呢？

好高興政府採納建議，將有關6個月嘅規限刪除，令局長可以更迅速、有效咁制裁有關潛逃者。政府同時亦提出修訂，訂明任何人唔會單純因為，曾經與有關潛逃者簽訂合約或合夥做生意，就因而誤中副車，惹上官非。

此外，草案亦授權局長給予特別准許，讓一啲無辜嘅人，可以合法地解散相關嘅合資公司或出售相關聯名物業，以保障佢哋嘅合法權益，同時又唔會令有關潛逃者得益。相關嘅條文同修訂已取得適當平衡，寬緊得宜，值得支持。