《維護國家安全條例草案》二讀發言

主席，政府就《基本法》23條立法諮詢期間，我接觸咗唔少建測規園界及其他界別嘅人士，佢哋全部都支持立法。但亦有少數人唔太明白，香港已訂立《港區國安法》同埋完善選舉制度，係咪仍有急切性進行23條立法呢？

我嘅答案係非常肯定嘅。第一，落實23條立法，係《基本法》賦予特區嘅憲制責任。香港已回歸祖國已經接近27年，冇任何理由唔馬上做。

第二，身為中國人同特區公民，維護自己國家嘅安全、主權同發展利益，絕對係天經地義，義不容辭。

第三，有人話香港依家最逼切係振興經濟，改善民生，但只要我哋重溫我國嘅近代史，睇睇現今多個外國嘅例子，都說明，沒有國家安全同社會穩定，就根本談唔上任何經濟發展或民生福祉。

第四，數年前嘅黑暴風波同埋港版顏色革，證明香港面對嘅國家安全風險，係實實在在，貼身而逼切嘅。

第五，不少海外國家，包括美、英、澳、加等，早已訂立唔少更嚴、更廣嘅國家安全法例，罰則比香港重，而且往往冇乜做諮詢，幾日之內就完成立法。部分濫用國安為名，打壓別國為實，以維護自身嘅軍事、經濟同科技霸權。

有人擔心23條立法，會影響人權法治同埋「一國兩制」。條例草案嘅「弁言」第一句就強調，要堅持「 一國兩制」、「港人治港」同高度自治方針；第2條列出嘅三大立法原則，訂明必須尊重同保障人權，會沿用無罪假定、一罪不得兩審、嫌疑人依法享有訴訟權等普通法原則。

有關原則喺草案嘅每一項條文同罪行均有體現。例如第73條，有關延長國安罪行嫌疑犯嘅羈留限期，草案建議係「48小時+7日+7日」，即係最多不超過16日，比部分國家短好多。而且有關延長羈留申請，必須經法官審批，由司法機關獨立把關。

有人憂慮23條罪行好容易令人誤墮法網，實情係草案內絕大部分罪行，都須由控方證明被告喺有犯罪意圖及明知故犯，先至有機會被定罪。例如係煽惑叛亂罪，絕對唔係單純鬧下政府就犯法，而係必須有明確嘅煽動意圖。有關勾結境外勢力同披露國家秘密嘅罪行，亦訂明要有危害國家嘅意圖。

事實上，喺草案審議期間，多位委員都質疑過，部分罪行嘅舉證要求似乎過於嚴苛，擔心難以將一啲擅於「打擦邊球」嘅罪犯繩之於法。例如條例第112同113條，有關國安案件嘅律師、警員、以至法官同佢哋嘅家人被「起底」，對有關人員作出威嚇等，控方要喺無合理疑點下，證明被告係明知同有犯罪意圖，並且會客觀地造成傷害，先至有機會入罪。

對於新聞界關注嘅「非法披露國家秘密罪」，條例除訂明須由控方證明被告，係知情同有意危害國安之外，亦引入咗「公眾利益辯解」，亦即第29條嘅「指明披露」。有關法定抗辯理由，喺大部分西方國家嘅國安法都並冇列明。

主席，《維護國家安全條例草案》，一方面能夠有效維護國家安全，一方面對人權自由、司法獨立、同普通法傳統，作出充分嘅保障；各項罪行嘅範圍與罰則，相對其他國家都係合情合理，寬緊得宜。我同G19全體18位議員，全力支持草案通過二讀。本人謹此陳詞。