「設立香港勞動模範評選機制」議案發言

主席，社會嘅發展同進步，有賴各行各業不同持份者、參與者嘅努力，對成績出色嘅人士予以表揚，係理所當然嘅。講到勞動模範，原議題提到「工匠精神」，我當然要表揚一下我哋建造業界嘅從業員。冇佢哋，就冇今日香港咁完善嘅基建，冇咁多各式各樣嘅樓宇作各種活動。

唔單止係前線地盤工人，中層嘅技術人員，包括我代表嘅建測規園同其他各類專業人士，佢哋嘅付出都好值得社會表揚。我希望政府會繼續努力，更有效咁精簡與發展及建設相關嘅法定同行政程序，減少業界不必要嘅工作量，讓佢哋取得更合理嘅回報，同更平衡工作與休息時間。

第二類勞動人口我想表揚嘅，就係過往經常被忽視嘅物業管理業從業員。現時做物管，唔單止係做清潔同保安，而係提供愈嚟愈廣泛、專業化，以及同市民生活息息相關嘅服務。近年引起社會關注嘅樓宇維修、消防安全、垃圾徵費，以至尋日我哋啱啱討論完嘅餵飼野鴿及飼養寵物問題，物管業都扮演住重要嘅角色。

同建造業一樣，物管業近年面對人手不足、從業員老化同社會形象偏低等問題。市民不時批評屋苑管理費貴，但好少會諗下，物管從業員每日做得幾辛苦，比以前要做多幾多嘢。

第三類想講下公務員。上周公布嘅公務員薪酬趨勢調查結果，引起唔少市民關注。有人質疑有關數字未能準確反映私人勞動市場嘅實況；有人認為政府面對財赤，要舉債同加稅嚟滅赤，唔應該跟足調查結果嚟為公務員加薪；亦有批評指部分部門同公務員嘅表現未如理想，大花筒同蛇王、偷懶個案時有所聞，唔值得劃一獲加薪。

我代表嘅建測規園業界，有唔少選民喺政府任職。當中我認識嘅好多人都係好辛勤工作，有創意亦有承擔，為香港嘅發展同建設努力，為市民提供優質嘅服務。唔應該因為有個別或少數嘅同事表現欠佳，就一竹篙打一船人，反對佢哋按照既定機制調整薪酬。

不少批評可能係源於現時制度，包括公務員管理制度，薪酬調整未能有效咁區分表現優異、表現平庸、同表現差劣嘅人員，作出適切嘅獎勵同處罰。今屆政府推出咗「行政長官表揚榜」計劃，定期公開表揚優秀同具示範作用嘅公務員團隊或人員，但是否獲得表揚，同佢哋嘅薪酬待遇基本上係無關。

因此，政府有必要檢視現行制度，避免可能會產生「劣幣驅逐良幣」嘅效果；令到一啲能力優異，可以喺私人市場取得更好待遇嘅優質公務員考慮離開政府；一啲表現庸劣、喺市場缺乏競爭力、能力與薪酬不成正比嘅人員，就會繼續留低及不作改善，令政府整體表現難以提升，希望政府認真思考有關問題。

本人謹此陳詞，支持原議案同修正案。