20241211《2024年消防安全(建築物)(修訂)條例草案》修正案發言

主席，我發言支持保安局局長就《2024年消防安全(建築物)(修訂)條例草案》提出嘅各項修正案，以及代表G19支持稍後嘅草案三讀。今次修正案數目唔算多，但唔代表法案委員會冇認真審議，或者局方冇採納議員嘅建議。主因係議員提出嘅意見，唔少都係有關條例嘅公眾宣傳、執行細節，以及相關支援措施等，而並非直接涉及條文內容。

當中包括推展消防代辦工程嘅門檻同優次，向業主追討工程費用及相關嘅釘契程序，新買家購入有未遵辦消防安全指示嘅單位後嘅通知機制等，當局已承諾會制訂好相關嘅準則、指引同宣傳配套，以便利各方有效執行同遵守新嘅法例要求。

第一組修正案係有關草案嘅生效日期，由原定嘅另藉附屬法例指明生效日期，改為喺新例刊憲當日就即時生效，以反映當局對從速提升舊樓消防安全嘅決心，呢個態度我係表示歡迎嘅。但正如我喺二讀發言指出，政府嘅積極有為態度，會否被部分業主誤解咗，以至曲解變成佢哋唔使再自行推展必需嘅改善工程，可以歎慢板，蹺埋手，等政府進場代辦。

我明白新法例即時生效，唔代表政府可以即時派員進駐某啲大廈展開工程，當中仲涉及好多籌備同甄選程序。但無論如何，我希望當局可以盡早公布進行代辦工程嘅準則、優次同首批代辦工程嘅樓宇名單，等一啲心存僥倖，以至別有用心嘅業主可以死咗條心。

對於加強檢控一啲有力、但無心遵從法例要求嘅業主，以及將積存大量未獲遵辦消防安全指示嘅樓宇名單放上網頁，公告天下，我覺得應該盡快做，即刻做，毋須等埋代辦工程準備好晒先至一齊做。

另一組修正案係有關部分條文嘅行文用語，主要係針對草案嘅中文版。我喺審議好多其他條例草案時都批評過，有唔少香港法例嘅中文寫法，係好難睇得明嘅。有啲律師同議員同事會講：你睇番英文版就明架喇！畀人嘅感覺，好似中文係次一等嘅語言，無法表達一啲比較專業同複雜嘅條文，甚至好似係一定要識英文先可以認識法律咁；我相信呢啲並唔係事實。

我明白基於種種歷史原因，好多香港嘅原有法例，甚或係新擬訂嘅草案條文，往往都係先寫英文，後譯中文。亦有啲英文法律用語同相關嘅中文譯法，過往有法庭案例解釋過，當局擔心作出改動會影響其涵義。但須知中文同英文都係香港嘅法定語言，同樣具有法律效力，我哋唔應該接受有啲法例只有英文睇得明，中文就好難明。

我希望當局正視有關問題，唔係要求一次過檢視、同更改所有法例嘅中文版，最重要係切實提升相關法律草擬人員及其他官員，對中文要有同樣嘅重視。本人謹此陳詞。