20250611《2025年房屋(修訂)條例草案》二讀發言

主席，公屋係珍貴、昂貴嘅公共資源同社會福利。依家每個公屋單位，平均建造費往往接近100萬元，有關數字仲未計算地價，以及房委會需要長期承擔嘅日常管理同維修保養費用。此外，截止今年3月底，輪候冊上仍有超過20萬宗申請等緊「上樓」。因此，不論係喺善用公共資源嘅角度，定係為咗維持公屋政策嘅公平性同可持續性，當局都有必加強打擊各類濫用公屋行為。

我多年來要求政府加緊處理濫用公屋問題，但當時社會同議會都比較民粹，有啲政黨同地區人士唔想得失現有嘅公屋租戶，擔心對參選會有所影響；加上部分官員對事件亦有所抗距，因而遲遲未有正視問題，令到濫用行為變得愈嚟愈嚴重同明顯；浪費咗不少公屋資源，減慢咗正常嘅公屋流轉，亦間接令到政府需要動用更多人力、物力、同土地，去興建更多公屋單位，滿足需求。

今屆政府相對處事積極，採取咗多項措施，依法加強打擊各類濫用公屋行為。包括加強向不同部門以至內地當局，核查公屋租戶嘅資產同收入情況，揪出隱瞞及欺詐個案；要求租戶限時申報資產及入息資料；着力收緊公屋富戶政策；以及喺今年1月推出「舉報濫用公屋獎」等，希望能達致善用公屋嘅目標。

事實證明有關措施係有效嘅，短短一年多時間，已協助房委會收回約7千個公屋單位。若折算為建造費，已為納稅人慳番多達70億元。而且有關單位唔少都位處市區，特別受申請者歡迎。而頗為出人意表嘅係，有關措施獲得大部分香港市民，不論係排緊公屋，定係住緊公屋，或者並不符合資格申請公屋嘅市民都支持，反映不少市民都對濫用公屋問題感到非常不滿。

今日恢復二讀《2025年房屋(修訂)條例草案》，目的係配合房委會進一步嘅打擊濫用措施，包括將部分嚴重濫用行為，例如有償咁分租單位，或者將公屋單位用作貿易或業務列為刑事罪行；仲有授權房屋署人員，要求涉嫌非法入住或喺單位內經營業務嘅人士提供身份資料；以及延長部分罪行嘅檢控時限，同引入定額罰款制度等等，藉此增強相關部門嘅執法能力同法例嘅阻嚇力。

有關修例建議嘅大原則都係值得支持嘅，關鍵係條文及執行細節，尤其係有關禁止將公屋單位用於貿易或業務嘅規定。對於部分租戶將公屋單位變成診所、美容院、健身室、貨倉，以至係Party Room嚟牟利，大家都認同係屬於嚴重濫用行為，應當將其刑事化同加強打擊。

不過，如果只係將單位用作商業登記或通訊地址，或者間歇咁幫一兩位學生補下習，以至係租戶在家工作、搞下網上直播等等，性質上同當年好多基層家庭，一家大細喺單位內穿膠花、剪線頭等手作業幫補家計，其實冇乜分別。因此，唔少人士都認為有關行為不應被禁止，以免對公屋居民自力更生，為香港經濟作出貢獻造成障礙。

就此，政府喺法案委員會已作出澄清，無論喺法律條文上或具體執法上，上述行為都唔會被視作嚴重濫用。局長稍後將動議修正案，將相關條文嘅寫法與現行《稅務條例》睇齊，訂明租戶將單位用作「經營貿易或業務」，先至有機會違法。當局亦會喺有關罪行於明年3月正式實施前，做好相關嘅宣傳教育工作，避免公屋租戶誤墮法網或引起不必要嘅恐慌。

事實上，早前房委會提出收緊公屋富戶政策，亦有相關嘅討論。基層家庭因為入住咗公屋，租金開支大減，加上自己努力工作，升職加薪，創業致富，又或者因為子女讀書及事業有成，家庭收入及資產增加而成為富戶，正正係公屋政策所希望達到嘅目標，唔應該因而為公屋富戶貼上太多負面嘅標籤。

關鍵係要為已成功脫貧，不再符合入住公屋資格嘅租戶，提供其他合適、合理嘅住屋選擇。例如係提供足夠嘅資助出售房屋供應，鼓勵佢哋自置物業，盡早交還公屋單位予有需要嘅市民入住。好高興政府聽咗意見，承諾檢討公營房屋中用作出租同出售嘅單位比例，適時、適度咁增加居屋等出售單位嘅供應。

此外，雖然近年私樓樓價有所下調，但住宅租金卻未有睇到明顯回落，令到唔少不合資格申請公屋，但又未夠能力置業嘅市民叫苦連天。隨着公屋輪候時間有序回落，十年長遠房屋策略供應目標可望超標完成，我希望政府會再適時考慮我之前提出嘅另一項建議，推出新一類租金水平較高，但入息及資產上限亦較為寬鬆嘅出租公營房屋，專畀呢類「唔上唔落」嘅中等收入家庭，喺指定年期內租住，以減輕佢哋租金負擔，令佢哋有空間儲錢買樓，進修增值，促進佢哋向上流動。

最後，正如我喺早前審議其他政策同法案時指出，對於打擊各類型嘅濫用公屋行為，專業嘅物業管理公司同物管從業員可以扮演更大嘅角色。我促請當局加強對物管業界嘅諮詢、指引同培訓，提供更多支援及誘因，鼓勵佢哋協助落實各項政策，齊心做出市民希望見到嘅成果。

本人謹此陳詞，支持草案二讀、三讀同各項修正案。