20250612「全面推展醫療融資改革，善用公私營醫療資源」議案

主席，正如局長剛才指出，香港嘅醫療融資問題，早喺回歸前開始討論。1999年發表嘅《醫療融資顧問報告書》，俗稱「哈佛報告」，已預示咗香港醫療體系依家出現嘅種種問題，包括人口老化加劇、醫護人手短缺、公私營醫療失衡，以及公共醫療開支膨漲等等。報告當時預計，如果再唔盡快推行改革，未來政府就要將超過兩成嘅經常性開支投入公共醫療服務。當年嘅衞生福利局局長霍羅兆貞，形容呢個水平係不能接受，會導致其他同樣重要嘅公共開支被犧牲。

26年後嘅今日，報告提出嘅「聯保供款制度」、即係其後稱為「強醫金」嘅建議，仲有調整公營醫療收費、增加醫護人手、改革私營醫療監管制度等等，都因為不同理由而遲遲未有推行。現時公共醫療嘅經常開支比率，早已達到當年官員口中嘅不可接受水平，亦係政府出現嚴重財赤嘅成因之一。

一個26年前經已指出嘅問題，點解一直都冇認真處理呢？我認為原因之一係民粹主義。香港公私營醫療失衡嚴重，除咗因為私營收費偏高，公營收費過低亦係成因。尤其是香港公營醫療服務嘅專業水平仲係相當高，唔少移咗民嘅香港人都專登飛番嚟睇病。收費低，質素高，但服務供應有限，自然就造成短缺，非緊急病症輪候長，引起不少怨言。

政府同醫管局過去多次提出調高公營醫療收費，但每每都遭到部分市民、議員同政黨反對，批評政府向基層開刀，尤其係臨近選舉嘅時候。但係如何妥善處理現行收費模式會導致嘅輪候時間延長，濫用同浪費行為增加，以及遲早會令到政府財政爆煲，最後大家都成為輸家嘅問題呢？

醫療改革，困難重重，另一個原因係保護主義作祟。改革醫委會制度、輸入非本地培訓醫生、善用中醫藥及其他輔助醫療服務等等，推咗十幾年都慢如牛步，喺立法會屢遇拉布，不少人指出係因為觸動到某啲人嘅既得利益。有人更歸咎係同近年嘅醫療衞生官員及醫管局嘅高層，十居其九都西醫出身有關，出現所謂嘅「醫醫相衛」甚至「西醫霸權」嘅問題。

局長，我知道你係一位醫生，但我相信你係會以病人、同市民嘅利益為先。今屆政府已先後推出多項已磋跎多年嘅重要醫療改革，包括放寬輸入醫護專才、加強中西醫協作、推動基層醫療、提升輔助醫療服務、調整公營醫療收費、提高私營醫療收費透明度，以及強制私家醫生將重要病歷資料上載「醫健通」等，睇得到依家政府係有改革嘅決心，唔會遇難避事。

就此，我呼籲所有市民、議員、同醫療人員，都要以病人及納稅人嘅長遠利益為重，理性、務實、同前瞻性咁考慮各項改革建議。主席，本人謹此陳詞。