20250717「構建長者友善生活環境」議案

主席，早喺2012年我首次當選立法會議員，當時根據政府定義，我仲未算係長者，我已促請政府盡早採取措施，處理香港人口持續老化帶嚟嘅種種挑戰同問題，包括如何喺城市規劃、建築設計，以及科技應用等方面，構建對長者友善嘅生活環境。

就此，我聯同一批來自建築、測量、規劃，以及安老、創科等界別嘅專業人士，成立「長者適切居所及相關配套研究工作小組」，並喺2016年發表報告，提出咗8點建議：包括提供誘因以鼓勵發展商興建更多長者適切居所；檢視相關嘅規劃標準、地契條款同建築法規；喺住宅嘅室內設計同公共空間建築，引入長者友善嘅設計同配套設施等等。

然而，由於報告內容涉及最少4至5個政策局同十多個政府部門嘅工作，難以訂定牽頭統籌嘅部門；加上相關問題當年相對冇咁迫切，因此建議遲遲未獲積極跟進。期間香港嘅長者人口不斷增多，佢哋面對嘅生活難、出行難問題，亦變得愈嚟愈嚴重同迫切，以「居家安老為本」嘅政策目標似乎淪為口號。

好高興，今屆特區政府肯認真面對問題，包括率先喺公營房屋引入《幸福設計指引》，改善長者嘅生活及居住條件，促進長幼共融。喺2023年嘅《施政報告》，政府宣布會推出有利長者生活嘅樓宇設計，增撥資源推動樂齡科技同長者終身學習，之後又成立「促進銀髮經濟工作組」。相關長者友善設計指引現已分階段實施，雖然比我哋當年嘅建議遲咗接近10年，但總算踏出咗重要嘅一大步。

展望未來，我認為政府喺兩大方面仍須加強工作。其一係單位內部同樓宇公用地方嘅設計，只係長者嘅生活環境嘅其中一部分，要做到原議案強調嘅滿足長者嘅社交活動需要，提升佢哋嘅生活質素同幸福感，喺單位同樓宇以外，好似街道設施、公交服務、公園等公共空間，不同類型嘅政府設施同服務等，都需要做到長者友善，同埋鼓勵長幼共融。

其二係除咗城市規劃及樓宇設計等硬件之外，照顧及支援服務等軟件亦同樣重要。人口老化，加上少子化同移民潮，令到獨居長者、雙老家庭、以及長者身兼照顧者嘅情況愈趨普遍，加強支援服務實在係刻不容緩。除咗依賴社福界，我認為政府可以進一步善用、重用物業管理服務，透過向專業物管公司及從業員提供適切嘅資助同培訓，加強支援居家安老嘅長者同照顧者。

上述工作其實已經超越發展局嘅政策範圍，今日有官員嚟到嘅勞福局、醫衞局、商經局，以至未有人列席嘅運輸及物流局、民政及青年事務局、文體旅局、房屋局等等，都要共同努力參與，將應對人口老化，提升長者生活視為重要嘅工作目標。本人謹此陳詞，支持原議案及各項修正案。