「發展香港成為中外文化藝術交流中心」議案

主席，中央政府喺「十四五」規劃中，首次提出支持香港發展成為中外文化藝術交流中心，為本港嘅文化、藝術，以及相關嘅旅遊同創意產業，帶嚟不少發展機遇。馬逢國議員今日動議嘅議案，分別喺政府架構、財政支援、以及政策措施三大範疇，提出合共七項具體建議。而姚思榮議員嘅修正案，再針對推動文化旅遊發展提出第八項建議。各項建議我都係認同及支持嘅。

以下我會集中講吓政府架構問題。特首日前透露，正就政府現行架構進行重組檢討，以供下屆政府同下屆立法會考慮。據報重組嘅方向，會包括今次議案提出嘅成立「文化、體育及旅遊局」。

主席，我喺過去幾年提出嘅議員議案同施政報告意見書，都有建議當局重組有關土地、房屋、運輸及環保政策嘅政府架構，目的係提升政府施政同覓地建屋嘅效率。對於純粹增加或分拆更多政策局，我哋業界有人支持，但亦都有人表達咗憂慮，擔心再增多幾個局，會唔會變成將來想推展某啲發展項目時，就又要走多幾個部門去申請審批，令到現時已相當嚴重嘅政出多門、各自為政問題進一步加劇，與提升施政效率、加快覓地建屋等目標背道而馳。

統籌跨政策範疇嘅工作，處理跨政策局嘅協調，現時主要喺由政務司司長同財政司司長負責，但大家都知道兩位司長已經好多嘢做，而每位司長又要統籌多個政策局嘅工作，部分計劃更可能要同另一位司長轄下嘅局與部門協調，係咪顧得咁多，能夠有效、高效咁推展呢？實在係令人擔憂嘅。

其實《基本法》已訂明，特區政府可設立副司長一職。隨着政府職能不斷增多，涉及跨局、跨部門嘅工作愈嚟愈常見，政府係咪應考慮增設副司長嘅職位，協助兩位司長處理跨局協調工作，以及專責推動一啲涉及大量政策局與部門嘅政策同發展計劃，例如係人口政策、青年問題、文宣工作、粵港澳合作、「十四五」規劃嘅推展落實，以至某啲大型嘅填海造地及新發展區項目等。

據報擬設嘅「文體旅遊局」，將會接管現時分散喺多個局與部門嘅文物保育工作。我向來批評政府嘅文物保育政策係「保而不育」，將一啲具歷史價值及建築特色嘅文物保存落嚟之後，就冇再積極咁活化同善用，浪費咗珍貴嘅土地資源同歷史文化遺產。希望如果設立咗新嘅政策局，就可以大力加強有關工作，結合文物保育與文化、藝術及旅遊發展，將香港建設成真正嘅中外文化藝術交流中心。本人僅此陳詞。