[:zh]就2021-2022年度財政預算案之二讀發言 [:]

[:zh]主席，本人發言支持《2021年撥款條例草案》嘅二讀。財政司司長陳茂波喺今年嘅預算案諮詢宣傳片，打扮成廚師，立即就有人諗，政府喺上年同今年均面對嚴重財赤，就算有再好嘅大廚，都只能「限米煮限飯」。亦有人擔心陳茂波司長幫市民下廚，最後會否變成「阿茂整餅」，「冇嗰樣整嗰樣」！

好彩，正如我喺預算案公布後指出，喺香港經濟深受黑暴同疫情打擊、出現嚴重衰退、同去年破紀錄嘅2500多億元財赤下，財爺總算做到「限米煮好飯、同舟渡難關」，做到「應使則使」同「能者多付」，提出咗多項穩經濟、創就業、紓民困，以及為庫房開源節流嘅措施。

喺「應使則使」方面，政府回應咗我同建測規園界嘅意見，承諾維持每年逾1,000億元基建投資，藉此刺激經濟、創造就業。另外預留5.5億元優化郊野公園設施、改善10條熱門行山徑，以及多項文化、康體、醫健、環保及地區民生建設，促使香港建成為更健康、更宜居嘅城市。

新冠疫情突顯香港唔少樓宇嘅老化同渠管播毒問題，政府亦採納咗我同業界嘅另一建議，喺預算案預留10億元，資助超過3,000幢舊樓維修渠管，並會主動為「三無大廈」進行相關工程。隨着傳染能力更強嘅變種病毒疑似殺入社區，我希望有關工作可以加快，咁做亦有助增加建造業界嘅工作同就業機會，緩解佢哋面對嘅高失業率況，一舉多得。

紓解民困方面，今年預算案喺「限米」之下，仍然保留多項針對個人同企業嘅紓緩措施，包括繼續提供薪俸稅、利得稅及差餉寬減；向住宅用戶提供1,000元電費補貼；調高「中小企貸款融資擔保計劃」嘅貸款額及延長還款期等。新措施有派發5,000元電子消費券，不過要等到暑假至推出，又係需要加快，同時要盡量簡化登記同使用程序，方便消費者同商戶。

針對高失業率問題，預算案提出設立上限8萬元嘅失業個人特惠貸款計劃，以及撥款66億元開創約3萬個臨時職位。前者交咗畀銀行去處理，所以今個月就落實到，係咪反映咗政府與私營企業喺工作效率上嘅差異呢？至於開創臨時職位，我同業界一向大力支持，市民有工開，就自然有錢消費，唔使靠政府派錢同派消費券。

政府之前應我同業界要求，透過防疫基金，資助私人企業聘用建測規園界嘅畢業生同助理專業人員，幫到多達1,400名年輕業界人士。我希望有關臨時職位可以幫到今年畢業同準備考取專業資格嘅年輕業界人士，等佢哋唔使畢業變失業，失去培訓成為專業人士嘅機會。

開源節流方面，預算案亦接納咗我嘅建議，適度調高股票交易印花稅及汽車首次登記稅。加稅從來冇人會歡迎，亦不存在幾時加會好啲，幾時加冇咁好，希望受影響嘅人士同業界多多理解。

預算案提出研究引入累進差餉制度，我認為政府應一併研究，調高樓價超過5,000萬及1億元嘅「超豪宅」嘅物業交易印花稅，同時研究調低中低價物業嘅印花稅徵收率，「貴加平減」，一方面增加政府稅收，一方面有利有需要嘅市民上車同換樓。貫徹我由始至終主張嘅「能者多付」、從香港整體利益考慮嘅原則。

提振經濟方面，預算案強調香港要把握世界經濟重心「西向東移」嘅大變局，發揮「一國兩制」優勢，善用祖國發展機遇，聚焦發展金融服務及創新科技產業。預算案亦提出多項措施，協助香港建造業界培訓人才、管理成本、提升效益及推動工務工程數碼化等。我認為有關發展方向絕對正確，但政府必須講得出、做得到，並要做得快、做得好！

主席，我喺剛才發言中，講咗好多次叫政府加快工作，事實上，政府過去幾年提出咗唔少好嘅政策同措施，但執行起嚟畀人感覺係慢幾拍，遲遲落實唔到，或者喺落實時變咗形、走咗樣；好多發展計劃都有議而不決、決而不行、行而不果嘅毛病；有啲基建工程搞咗成七、八年，有時拖成十幾年仲停留喺研究、研究，以及規劃同諮詢階段，咁樣市民點會鍾意？

我喺之前嘅施政報告致謝動議辯論亦講過有關問題，議員追問政府工作進度，官員往往答「做緊、會盡快做，會壓縮時間」，但缺乏清晰嘅工作時間表同成效指標。過多幾年有關官員可能已調咗職，或者退咗休，市民都唔知可以追究、追問邊個。

市民除咗覺得公務員做嘢慢，另一個印象係「推」，政府真係要諗諗。咩係「推」呢？包括推卸責任、推掉工作、推畀其他部門。政策政出多門、部門各自為政、官員遇難避事嘅問題，有好多例子，喺近年嘅黑暴同疫情中更表露無遺。好彩我睇到最近係有改善，最緊要係攞出事實，講畀市民聽，政府係有大嘅改變，咁先能得民心。

針對香港近年出現嘅違法黑暴同政治亂象，中央政府使出「連環法律組合拳」，透過《港區國安法》為香港止暴制亂、由亂至治；透過人大決定完善香港嘅選舉制度，為特區政制發展堵塞漏洞、撥亂反正。但如果香港嘅官僚體系唔作出根本改革，提高效率、加強問責；如果香港嘅土地房屋問題繼續得唔到解決，市民嘅生活質素得唔到改善，政府嘅認受性同支持度始終難以提升，甚至會影響香港嘅繁榮穩定同長治久安，呢啲問題我哋絕對、絕對不能掉以輕心。本人僅此陳詞。[:]