20220216-17-18施政報告-致謝動議-發言

第二節辯論    「一國兩制」行穩致遠、提升管治效能 (17/2)

主席，中央喺過去一年多，先後通過《港區國安法》同完善特區嘅選舉制度，迅速為香港止暴制亂，撥亂反正，重新確立「愛國者治港」嘅原則。

為咗提升施政績效，施政報告提出重組政府架構，將現有嘅三司十三局，改組為三司十五局，以加強政府喺覓地建屋、文體旅遊、青年事務、以及「再工業化」等多方面嘅工作。有關建議方向正確，但係咪完成改組，就可以快速、確切咁提升政府嘅管治效能呢？係咪就可以達致有效率地改善經濟同民生嘅目標呢？唔少市民係有質疑嘅，尤其改組涉及增加多個高層官員職位，同相關嘅開支。

我代表嘅建測規園業界同時擔心，當增至十五個政策局之後，會否令政府嘅各自為政問題變得更嚴重呢？將來啲發展申請係咪要再跑多幾個局同部門、有更多嘅程序要跟、用更長時間去攞審批呢？

事實上，政府到底應有幾多個政策局，往往並非市民最關注嘅問題。市民最關心嘅，係佢哋幾時先至上到車、上到樓？佢哋嘅收入係咪可以追到通脹？香港幾時先可以再次「清零」、恢復通關？而我哋業界另外關心嘅，係發展項目申請係咪可以有效率地處理？年輕專業人士嘅工時同收入情況係咪可以改善？

要「一國兩制」行穩致遠，提升特區嘅管治效能，不能單靠完善選舉制度同重組政府架構，關鍵係要改變部分問責官員同公務員嘅「各家自掃門前雪」心態，掃除「唔做唔錯、得過且過；做又三十六、唔做又三十六」嘅官僚文化，洗脫特區政府予人「慢」同埋「推」嘅形象。

主席，國家主席習近平喺深圳講話時，強調作為政府領導，必須堅定理想信念、更新智識觀念，自覺站喺國家大局上想問題、辦事情，並要建立健全嘅激勵機制，推動形成「能者上、優者獎、庸者下、劣者汰」嘅正確導向。我認為香港市民最唔想見到嘅，係香港嘅公務員制度變成「做殘能者、玩殘優者、包容庸劣者」。

施政報告提出，要建立一支愛國愛港、忠誠、專業、高效、作為、擔當、同勤政為民嘅管治團隊，並會按「能者居之」嘅原則，檢視公務員高層職位嘅選拔聘任機制。呢番話係喺去年10月初講嘅，我希望當局可盡快提出具體改革方案，盡快畀市民睇到成績，政府嘅施政績效提升，市民嘅生活得以改善，咁一定有更多市民支持政府。